English | Inuinnaqtun | French





ᐊᐱᖅᑯᑕᐅᒐᔪᒃᐸᒃᑐᑦ ᐊᐱᖅᑯᑎᒃᓴᐃᑦ


ᓄᓇᒥᒃ ᐊᑐᖅᑐᐊᕐᓂᕐᒧᑦ ᓄᓇᒥᒡᓗ ᐊᑐᕐᓂᕐᒧᑦ ᐊᐱᖅᑯᑎᒃᓴᕆᔭᐅᕙᒃᑐᑦ

  1. ᖃᓄᖅ ᑕᒪᓐᓇ ᓄᓇᒥᒃ ᓂᕈᐊᕐᓂᕆᔭᐅᔪᖅ ᐊᒃᑐᖅᓯᓇᔭᖅᐸ ᕼᐋᒻᒪᓚᒃᑯᑦ ᐊᐅᓚᑦᑎᓂᕆᕙᒃᑕᖓᓂᒃ ᓄᓇᒥᒃ?
    ᓂᕈᐊᖅᑐᖃᖅᐸᑦ “ᐋᒃᑳᕐᓗᓂ”, ᕼᐋᒻᒪᓚᒋᔭᐅᔪᑦ ᐊᑐᐃᓐᓇᕋᔭᖅᐳᑦ ᓄᓇᒥᒃ ᐊᐅᓚᑦᑎᓂᕐᒧᑦ ᑭᒡᓕᒋᔭᐅᑎᑕᐅᔪᓄᓪᓗ ᒪᓕᒐᕋᓛᓄᑦ ᐊᐅᓚᑦᑎᔪᒪᓗᑎᒃ ᕼᐋᒻᓚᒃᑯᑦ ᓄᓇᖁᑎᒋᔭᖏᓐᓂᒃ.

    ᓂᕈᐊᖅᑐᖃᖅᐸᑦ “ᐊᖏᕐᓗᓂ”, ᑖᒃᑯᐊ ᕼᐋᒻᓚᒋᔭᐅᔪᑦ ᓂᐅᕐᕈᑎᖃᑐᐊᖅᐸᑕ ᓄᓇᒥ ᐃᒡᓗᕐᔪᐊᓄᑦ ᐃᓂᒋᔭᐅᔪᒃᓴᒥᒃ ᐃᓛᒃᑰᖅᑐᒧᑦ ᓂᐅᑯᖅᑐᒧᑦ, ᑖᒃᑯᐊ ᕼᐋᒻᓚᒋᔭᐅᔪᑦ ᐊᑐᕈᓐᓇᐃᓪᓕᓇᔭᖅᐳᑦ ᓄᓇᒥ ᐊᐅᓚᑦᑎᕝᕕᖃᕐᓂᕐᒧᑦ ᒪᓕᒐᕋᓛᕆᔭᒥᓂᒃ ᑖᔅᓱᒧᖓ ᓄᓇᒧᑦ. ᑭᓯᐊᓂᑦᑕᐅᖅ, ᕼᐋᒻᒪᓚᒃᑯᑦ ᑲᑎᒪᔨᖏᑦ ᓱᓕ ᐊᑐᖅᑎᑦᑎᔪᓐᓇᖃᑦᑕᕋᔭᖅᐳᑦ ᑭᒡᓕᖃᖅᑎᑦᑎᓂᕐᒧᑦ ᒪᓕᒐᕋᓛᕆᔭᒥᓂᒃ ᐊᐅᓚᑦᑎᔪᒪᓪᓗᑎᒃ ᑭᓱᓂᒃ ᓴᓇᔪᖃᖃᑦᑕᕈᓐᓇᕐᒪᖓᑦ ᑕᕝᕙᓂ ᓄᓇᒥ ᐃᒡᓗᕐᔪᐊᓄᑦ ᐃᓂᒋᔭᐅᔪᒃᓴᒥ ᖃᓄᕐᓗ ᑖᓐᓇ ᓄᓇ ᐊᑐᖅᑕᐅᔪᓐᓇᕐᒪᖓᑦ ᑭᐊ ᐱᒋᖦᖤᕋᓗᐊᖅᐸᒍ.

  2. ᓂᕈᐊᕐᓂᕆᔭᐅᔪᖅ “ᐊᖏᕐᓂᐅᒃᐸᑦ” ᑖᒃᑯᐊ ᕼᐋᒻᒪᓚᒃᑯᑦ ᑲᑎᒪᔨᖏᑦ ᓂᐅᕈᑦᑎᖃᓯᑲᐅᑎᒋᓇᔭᖅᐹᑦ ᓄᓇᓂᒃ ᐃᓂᒃᓴᓂᒃ ᓄᓇᓕᖕᓃᑦᑐᓃᒃ?
    ᓂᕈᐊᕐᓂᕆᔭᐅᔪᖅ “ᐊᖏᕐᓂᐅᒃᐸᑦ”, ᓄᓇᓕᖕᒥᐅᑦ ᑐᓂᓯᕗᑦ ᕼᐋᒻᒪᓚᒃᑯᑦ ᑲᑎᒪᔨᖏᓐᓂᒃ ᐱᔪᓐᓇᐅᑎᒋᓕᕋᔭᖅᑕᖓᓂᒃ ᓂᐅᕐᕈᑎᖃᕈᓐᓇᕐᓂᕐᒥᒃ ᓄᓇᓂᒃ. ᕼᐋᒻᒪᓚᒃᑯᑦ ᑲᑎᒪᔨᖏᑦ ᐊᑐᕆᐊᖃᖅᑎᑕᐅᙱᓚᖅ “ᐊᖏᕐᓗᑎᒃ” ᓂᕈᐊᕐᓂᖅᑕᖃᖅᐸᑦ ᓂᐅᕐᕈᑎᖃᕈᓐᓇᕐᓂᕐᒥᒃ ᓄᓇᓂᒃ ᐃᓂᒃᓴᓂᒃ ᐊᒻᒪᓗ ᓂᐅᕐᕈᑎᖃᓯᑲᐅᑎᒋᔭᕆᐊᖃᙱᖦᖢᑎᒃ.

    ᐊᑐᓂᑦ ᑕᒪᕐᒥᒃ ᕼᐋᒻᓚᒃᑯᑦ ᑲᑎᒪᔨᖏᑦ ᐋᖅᑭᒃᓯᒪᓕᖅᑎᑦᑎᓂᐊᖅᐳᑦ ᖃᓄᖅ ᖃᑯᒍᓗ ᓂᐅᕐᕈᑎᖃᕋᔭᕐᒪᖔᕐᒥᓂᒃ ᕼᐋᒻᓚᒃᑯᑦ ᓄᓇᖁᑎᒋᔭᖏᓐᓂᒃ, ᓇᓕᐊᒡᓗ ᓄᓇᒥ ᐃᒡᓗᕐᔪᐊᓄᑦ ᐃᓂᒋᔭᐅᔪᒃᓴᑦ ᓂᐅᕐᕈᑕᐅᔪᓐᓇᕐᒪᖔᑕ. ᑭᑭᑕᐅᔪᓐᓇᖅᑐᑦ ᓄᓇᓕᐅᕗᑦ ᓴᖅᑭᑎᑦᑎᓯᒪᔪᑦ ᐱᑖᖅᐸᓪᓕᐊᓗᓂ ᐊᑐᖅᑐᐊᕐᓂᕆᔭᒥᓄᑦ ᐅᖃᖅᓯᒪᓗᑎᒃ ᑖᓐᓇ ᐊᑐᖅᑐᐊᖅᑐᖅ ᐱᔪᓐᓇᕐᓂᖓᓂᒃ ᐱᖃᓪᓚᑦᕐᓂᕋᐃᓂᕐᒥᒃ ᓂᕈᐊᕐᓂᖅᑕᖃᖅᐸᑦ “ᐊᖏᕐᓗᑎᒃ” ᐱᑖᕆᕙᓪᓕᐊᓂᕐᒧᓪᓗ ᐊᑐᖅᑐᐊᖅᑕᓂ ᐊᑭᓖᓯᒪᒃᐸᒍᑦ ᐊᑕᖏᑦᑎᐊᕐᓗᒍ. ᑭᓯᐊᓂᑦᑕᐅᖅ, ᐊᑯᓂᐅᐸᓗᒃᑲᔭᖅᐳᖅ ᐱᖁᔭᐅᑉ ᐊᓯᔾᔨᖅᑕᐅᓂᐊᕐᓂᕆᔭᖓ.

  3. “ᐊᖏᕐᓗᓂ” ᓂᕈᐊᕐᓂᖅ ᐊᓯᔾᔨᖅᓯᓇᔭᖅᐹ ᖃᓄᖅ ᕼᐋᒻᓚᒋᔭᐅᔪᖅ ᐊᑭᖃᖅᑎᑦᑎᓕᕋᔭᕐᒪᖔᑦ ᓄᓇᒥ ᐃᓂᒋᔭᐅᓂᐊᖅᑐᒦᒃ?
    ᐋᒃᑲ. ᓄᓇᒥ ᐃᓂᒋᔭᐅᓂᐊᖅᑐᑦ ᐊᑭᖏᑦ ᓄᓇᓕᔅᓯᓐᓂ ᐋᖅᑭᒃᓯᒪᓕᖅᑎᑕᐅᖃᑦᑕᐃᓐᓇᕐᓂᐊᖅᐳᑦ ᓄᓇᒥᒃ ᐱᕙᓪᓕᐊᑎᑦᑎᓂᕐᒧᑦ ᐊᑭᒋᔭᖏᓐᓂᑦ ᒪᓕᒃᑐᖃᕐᓗᓂ ᓄᓇᒥᒃ ᐊᐅᓚᑦᑎᕝᕕᖃᕐᓂᕐᒧᑦ ᒪᓕᒐᕋᓛᕆᔭᐅᔪᓄᑦ ᓄᓇᕗᓪᓗ ᒐᕙᒪᖓᑕ ᓄᓇᒧᑦ ᐊᑐᐊᒐᕆᔭᖏᓐᓄᑦ. ᐅᓪᓗᒥᓯᐅᑏᑦ ᓄᓇᕗᑦ ᒐᕙᒪᖓᑕ ᓄᓇᒧᑦ ᐊᑐᐊᒐᕆᔭᖏᑦ ᐃᒪᐃᑎᑦᑎᔭᕿᐊᖃᖅᐳᑦ, ᑕᒪᒃᑯᐊ ᓄᑖᑦ ᓄᓇᒥ ᐃᓂᒋᔭᐅᔪᒃᓴᐃᑦ ᐊᑭᖃᖅᑎᑕᐅᓗᑎᒃ ᐊᑭᑐᓂᖅᓴᐅᙱᓪᓗᑎᒃ ᐊᑭᖓᑕ ᐋᖅᑭᒃᓱᖅᑕᐅᕙᓪᓕᐊᓂᖏᑕ ᑕᒪᒃᑯᐊ ᓄᓇᒥ ᐃᓂᒋᔭᐅᔪᒃᓴᑦ. ᓄᑕᐅᙱᓐᓂᖅᓴᓄᑦ ᐱᑕᖃᖅᐸᒌᒃᑐᓄᑦ ᓄᓇᒥ ᐃᓂᒋᔭᐅᔪᓄᑦ, ᑲᑎᒪᔩᑦ ᓂᕈᐊᕆᔭᖃᕈᓐᓇᖅᐳᑦ ᓂᐅᕐᕈᑕᐅᔪᓐᓴᕐᓂᖓᓄᑦ ᐊᑭᐊᓂᒃ ᐊᓯᔾᔨᖅᑕᐅᓂᖓᓄᓪᓘᓐᓃᑦ ᐊᑭᖓᓂᒃ ᑖᓐᓇ ᐊᑐᖅᑕᐅᓗᓂᓗ ᖃᔅᓯᑐᖅᑎᑕᐅᓂᐊᕐᓂᖓᓄᑦ. ᓂᐅᕐᕈᑕᐅᕙᖕᓂᕐᒧᑦ ᐊᑭᖓ ᐋᖅᑭᒃᓯᒪᓕᖅᑎᑕᐅᕙᒃᐳᖅ ᐱᓕᕆᔪᓐᓇᓪᓚᕆᒃᑐᒥᑦ ᐊᔪᙱᓐᓂᖃᖅᑐᒥᑦ ᓄᓇᐅᑉ ᐊᑭᖓᓂᒃ ᖃᔅᓯᑐᕐᓂᕋᐃᕙᑦᑐᒥᑦ ᑭᒃᑯᑐᐃᓐᓇᓂᓪᓘᓐᓃᑦ ᐊᑭᑦᑐᕋᐅᑕᐅᓗᓂ. ᐊᓯᔾᔨᖅᑕᐅᓂᖓᑕ ᐊᑭᖓ ᐋᖅᑭᒃᓯᒪᓕᖅᑎᑕᐅᕙᒃᐳᖅ ᖃᓄᖅ ᐊᑭᑐᑎᒋᓇᔭᕐᓂᖓᓄᑦ ᐋᖅᑭᓱᐃᓂᐊᕐᓗᓂ ᐊᔾᔨᑲᓴᖓᓂᒃ ᓄᓇᒥ ᐃᓂᒥᒃ ᓄᓇᔅᓯᓐᓂ ᐅᓪᓗᒥ ᐊᑭᒋᔭᐅᕙᓕᖅᑐᓄᑦ.

  4. “ᐊᖏᕐᓗᓂ” ᓂᕈᐊᖅᑐᖃᖅᐸᑦ ᐊᓯᔾᔨᖅᓯᓇᔭᖅᐹ ᖃᓄᐃᓕᐅᕈᓐᓇᕐᓂᕆᔭᖏᓐᓂᒃ ᕼᐋᒻᓚᒋᔭᐅᔪᑦ ᑮᓇᐅᔭᓄᑦ ᐱᔭᒥᓄᑦ ᓂᐅᕐᕈᑎᖃᕐᓂᕐᒥᓄᑦ ᐊᑐᖅᑐᐊᖅᑎᑦᑎᓂᕐᒥᓄᓪᓘᓐᓃᑦ ᓄᓇᒥ ᐃᓂᓃᒃ?
    ᐋᒃᑲ. ᕼᐋᒻᓚᒋᔭᐅᔪᖅ ᐱᔭᕆᐊᖃᐃᓐᓇᕐᓂᐊᖅᐳᖅ ᐃᓕᕙᒡᓗᒋᑦ ᑮᓇᐅᔭᐃᑦ ᐱᔭᑎᒃ ᑮᓇᐅᔭᖃᕐᕕᒋᔭᐅᔪᒥ ᐊᑎᖃᖅᑐᒥᒃ ᓄᓇᒥᒃ ᐱᕙᓪᓕᐊᑎᑦᑎᓂᕐᒧᑦ ᐊᑐᖅᑕᐅᔪᓐᓇᖅᑐᑦ ᑮᓇᐅᔭᐃᑦ, ᒪᓕᒃᑐᖃᕐᓗᓂ ᐅᓪᓗᒥᓯᐅᑎᓂᒃ ᓄᓇᒥ ᐊᐅᓚᑦᑎᓂᕐᒧᑦ ᒪᓕᒐᕋᓛᕆᔭᐅᔪᓂᒃ

    ᓄᓇᕗᓪᓗ ᒐᕙᒪᖓᑕ ᓄᓇᒧᑦ ᐊᑐᐊᒐᕆᔭᖏᑦ. ᑮᓇᐅᔭᐃᑦ ᑕᕝᕙᓂ ᑮᓇᐅᔭᖁᑎᒋᔭᐅᔪᓐᓃᑦᑐᑦ ᐊᑐᖅᑕᐅᕙᒃᐳᑦ ᐱᕙᓪᓕᐊᑎᑦᑎᔾᔪᑕᐅᓪᓗᑎᒃ ᐃᑲᔪᖅᑐᕈᑕᐅᓪᓗᑎᒡᓘᓐᓃᑦ ᓄᑖᓂᒃ ᓄᓇᒥ ᐱᕙᓪᓕᐊᑎᑦᑎᓂᕐᒧᑦ ᐱᓕᕆᐊᖑᔪᓂᒃ.

  5. ᑲᑎᒪᔩᑦ ᐋᖅᑭᒃᓯᔪᓐᓇᖅᐸᑦ ᓄᓇᖃᕐᓂᕐᒧᑦ ᐃᓱᓕᑦᑕᕈᑎᓃᒃ ᓂᐅᕐᕈᑎᖃᕐᓂᐊᕐᓗᑎᒃ ᐊᑐᖅᑐᐊᖅᑕᐅᓂᐊᖅᑐᒥᓘᓐᓃᑦ ᓄᓇᒥ ᐃᒡᓗᕐᔪᐊᓄᑦ ᐃᓂᒃᓴᖁᑎᒋᔭᒥᓃ?
    ᒫᓐᓇ, ᑖᒃᑯᐊ ᕼᐋᒻᓚᐅᔪᑦ ᐱᔪᓐᓇᕐᓂᖃᙱᓚᑦ ᐃᒡᓗᖃᕆᐊᖃᖏᑦᑐᒃᓴᓂᒃ ᐋᖅᑭᒃᓯᔭᕆᐊᒃᓴᖅ ᑕᒪᒃᑯᓄᖓ ᐃᒡᓗᑦ ᓄᓇᖁᑎᖏᓐᓄᑦ ᓂᐅᕕᐊᒃᓴᐅᔪᓄᑦ ᐊᑐᖅᑐᐊᒐᒃᓴᐅᔪᓄᓪᓘᓐᓃᑦ ᑕᕝᕙᓂ ᕼᐋᒻᓚᐅᔪᑦ ᐃᓗᐊᓂ. ᑕᐃᒪᐃᓐᓂᖓᓄᓪᓗ, ᐃᓄᒃ ᓄᓇᖃᙱᑦᑐᖅ ᓄᓇᕘᒥ ᓇᖕᒥᓂᕆᔭᐅᒥᒡᓘᓐᓃᑦ ᐊᐅᓚᙱᑦᑐᖅ ᓄᓇᕘᒥ ᐊᑐᖅᑐᐊᕈᓐᓇᕋᔭᖅᐳᖅ ᓂᐅᕕᕈᓐᓇᕐᓗᓂᓘᓐᓃᑦ ᓂᕈᐊᖅᑐᖃᖅᐸᑦ “ᐊᖏᕐᓗᑎᒃ”. ᑭᓯᐊᓂᑦᑕᐅᖅ, ᓄᓇᕗᑦ ᒐᕙᒪᒃᑯᖏᑦ ᐊᓯᔾᔨᖅᓯᒋᐊᕋᔭᖅᐳᑦ ᐆᒥᖓ, ᓄᓇᓕᐸᐅᔭᕐᓄᑦ, ᓄᓇᓕᖕᓄᑦ, ᓄᓇᓕᑯᓗᖕᓄᓪᓗ ᐱᖁᔭᕐᒥᑦ ᕼᐋᒻᓚᒃᑯᓪᓗ ᐱᖁᔭᖓᓂᒃ ᐊᔪᖅᑎᑦᑎᔪᒪᙱᓪᓗᑎᒃ ᓄᓇᖃᕐᓂᕐᒧᑦ ᐃᓱᓕᑦᑕᕈᑕᐅᓇᔭᖅᑐᓂᒃ ᓂᐅᕕᖅᑐᖃᕐᓂᐊᖅᑎᓪᓗᒍ ᕼᐋᒻᓚᒃᑯᓐᓂ ᓄᓇᖁᑎᒋᔭᐅᔪᓂᒃ.


  6. ᖄᒃᑲᓐᓂᐊᒍᑦ ᐊᑭᓕᒐᒃᓴᖅᑕᖃᓕᕋᔭᖅᐹ ᐊᓯᔾᔨᕈᑦᑕ ᐊᑐᖅᑐᐊᕐᓂᕐᒥᑦ ᓇᖕᒥᓂᖃᓕᕐᓂᕐᒨᑦ?
    ᐄ. ᐊᓯᔾᔨᕐᓂᖅ ᐊᑐᖅᑐᐊᕐᓂᕐᒥᒃ ᓄᓇᒥ ᐃᒡᓗᕐᒧᐊᓄᑦ ᐃᓂᒋᔭᐅᔪᓂᒃ ᓇᖕᒥᓂᖃᓕᖕᓂᕐᒥᒃ ᓄᓇᒥ ᐃᒡᓗᕐᒧᐊᓄᑦ ᐃᓂᒥᒃ ᐊᒃᑐᐊᓂᓕᖕᓂᒃ ᐊᑭᓕᕆᐊᖃᖅᑐᖃᖁᑎᖃᕋᔭᖅᐳᖅ. ᑕᒪᒃᑯᐊ ᐊᑭᓕᕆᐊᓖᑦ ᓂᕆᐅᒋᔭᐅᔪᑦ ᐃᓚᖃᕋᔭᕐᓂᖏᓐᓂᒃ ᑎᑎᕋᖅᓯᒪᔪᒃᑯᑦ ᓇᓗᓇᐃᔭᕐᓂᕐᒥᒃ ᐊᑭᓂᒃ ᓄᓇᒥᒃ ᐱᖃᓕᕐᓂᕐᒧᑦ ᑎᑎᕋᕐᕕᒋᔭᐅᔪᒥ, ᒪᓕᒐᓕᕆᓂᕐᒧᑦ ᐊᑭᓂᒃ, ᐊᐅᓚᑦᑎᓂᕐᒧᓪᓗ ᐊᑭᓂᒃ. ᕼᐋᒻᓚᒋᔭᐅᔪᖅ ᐱᔭᕆᐊᖃᕋᔭᕆᕗᑦ ᑕᒪᓐᓇ ᐊᒥᐊᒃᑯᒋᔭᐅᔫᑉ ᐱᖃᕐᓂᕐᒧᑦ ᐊᑭᖓ ᑖᔅᓱᒪ ᓄᓇᒥ ᐃᓂᐅᑉ, ᐊᑭᓕᖅᑕᐅᓯᒪᙱᑦᑐᓂᒃ ᓱᓕ ᐊᑭᓕᒃᓴᓂᒃ ᖃᔅᓯᓂᒡᓘᓐᓃᑦ ᐊᑭᓕᒃᓴᕆᔭᐅᔪᓂᒃ ᕼᐋᒻᓚᒋᔭᐅᔪᒧᑦ ᐊᑭᓕᖅᑕᐅᓗᑎᒃ ᑕᒪᒃᑯᐊ ᓄᓇᐃᑦ ᐊᓯᔾᔨᖅᑕᐅᓚᐅᙱᓐᓂᖏᓐᓂ ᐊᑐᖅᑐᐊᕐᓂᕐᒧᑦ ᑕᐃᔭᐅᓯᒪᓂᖏᓐᓄᑦ (ᐊᑐᖅᑐᐊᕐᓂᕐᒧᑦ) ᐱᖃᓕᕐᓂᕐᒧᑦ ᑕᐃᔪᓐᓇᓕᕐᓗᒍ (ᓇᖕᒥᓂᖃᓕᕐᓂᕐᒧᑦ).
  7. ᓇᑭᑦ ᑮᓇᐅᔭᖅᑖᕋᔭᖅᐳᖓ ᓂᐅᕕᕈᑎᒋᓂᐊᖅᑕᕐᓂᒃ ᓄᓇᒥᒃ?
    ᑮᓇᐅᔭᖃᙱᒃᑯᕕᑦ ᐊᑭᓖᔾᔪᑎᒋᓂᐊᖅᑕᕐᓂᒃ ᓄᓇᒥ ᐃᓂᖕᓂᒃ ᐃᒡᓗᕐᔪᐊᕐᓄᑦ, ᐊᐱᕆᔪᓐᓇᖅᑐᑎᑦ ᐊᑐᖅᑐᐅᕈᒪᓗᑎᑦ ᑮᓇᐅᔭᓂᒃ ᑮᓇᐅᔭᒃᑯᕕᖕᒥᑦ, ᓲᕐᓗ ᑖᓐᓇ ᐃᒡᓗᕐᔪᐊᕐᒧᑦ ᐊᑭᓕᐅᑎᒋᕙᓪᓕᐊᓂᕐᓗᒍ, ᓲᕐᓗ ᐊᑐᖅᑐᐊᕋᔭᕐᓂᖅᑐᑦ ᑮᓇᐅᔭᓂᒃ ᐃᒡᓗᕐᔪᐊᓕᐅᖁᑎᖏᓂᐊᖅᑕᕐᓂᒃ.
  8. ᑭᓱᒥᒃ ᐊᔾᔨᒋᙱᓐᓂᖃᖅᐸ ᐅᑯᖕᓄᙵ, ᐱᓂᖅ ᐊᑭᓕᖅᐸᓪᓕᐊᓗᒍ ᐃᒡᓗᑖᖅᐸᓪᓕᐊᓂᖅ ᐊᑐᖅᑐᐊᖅᑕᐅᔪᒥᑦ ᓄᓇᒥᑦ ᐅᕝᕙᓘᓐᓃᑦ ᓇᖕᒥᓂᕆᔭᐅᔪᒥᑦ ᓄᓇᒥᑦ?
    ᓇᖕᒥᓂᖃᖅᑎᐅᓂᕐᒧᑦ ᓄᓇᒥᒃ (“ᓇᖕᒥᓂᖃᓪᓚᕆᖕᓂᖅ”), ᓂᕆᐅᒋᔭᐅᔪᖃᖅᐳᖅ ᑲᔪᓯᕙᓪᓕᐊᓂᕆᔭᐅᔪᖅ ᐱᓂᐊᕐᓗᓂ ᐊᑭᓕᖅᐸᓪᓕᐊᓗᒍ ᐱᑖᖅᐸᓪᓕᐊᓂᖅ ᐃᒡᓗᒥᒃ ᐊᑐᕋᔭᖅᐳᖅ ᐸᐃᑉᐹᓕᕆᓗᐊᙱᓐᓂᖅᓴᐅᓗᓂ ᐋᖅᑭᑦᑎᐊᖅᓯᒪᓂᖅᓴᐅᓗᓂᓗ. ᐊᖏᕐᓂᕆᔭᐅᔪᑦ ᕼᐋᒻᓚᒋᔭᐅᔪᓂᑦ ᐊᑭᓕᖅᐸᓪᓕᐊᓪᓗᒋᑦ ᐃᒡᓗᕐᔪᐊᖅᑖᕆᔭᐅᕙᓪᓕᐊᔪᓄᑦ ᐱᔭᐅᔭᕆᐊᖃᕋᔭᙱᓚᑦ ᐊᑐᖅᑕᐅᔭᕆᐊᓖᓪᓗ ᐊᑐᖅᑐᐊᖅᑕᐅᔪᓄᑦ ᐅᖓᕙᕆᐊᖅᑕᐅᔭᕆᐊᖃᕋᔭᙱᓚᑦ ᐊᖑᒻᒪᑎᔪᒪᓗᓂ ᐊᑐᖅᑐᐊᕐᓂᕐᒧᑦ ᒪᓕᒃᑕᐅᔭᕆᐊᖃᖅᑐᓂᒃ. ᓇᖕᒥᓂᖃᓕᕐᓂᕐᒧᑦ ᑕᐃᔭᐅᔪᓐᓇᕐᓯᓂᕐᒧᑦ, ᑮᓇᐅᔭᓕᕆᓂᕐᒧᑦ ᐃᓂᒋᔭᐅᕙᒃᑐᑦ ᐱᔪᒪᓂᖃᖅᐳᑦ ᐊᑐᕈᒪᓪᓗᑎᒃ 30−ᓄᑦ ᐊᕐᕌᒍᓄᑦ ᐊᑭᓕᖅᐸᓪᓕᐊᓗᒍ ᓇᖕᒥᓂᖅᑖᖅᐸᓪᓕᐊᔪᒪᓂᕐᒧᑦ ᐃᒡᓗᕐᔪᐊᓂᒃ; ᑭᓯᐊᓂᑦᑕᐅᖅ, ᐊᑐᖅᑐᐊᕐᓂᕐᒧᓪᓕ ᐱᑎᑦᑎᔪᒪᑐᐃᓐᓇᖅᐳᑦ ᐅᓄᕐᓂᖅᐹᖃᕐᓗᒍ 25−ᓂᒃ ᐊᕐᕌᒍᓂᒃ.
  9. ᕼᐋᒻᓚᒃᑯᓪᓕ ᑲᑎᒪᔨᖏᑦ ᓂᕈᐊᕆᔭᖃᕐᓂᖅᐸᑕ ᓂᐅᕐᕈᑎᖃᕈᒪᓗᑎᒃ ᓄᓇᒥ ᐊᑐᖅᑐᐊᖅᑕᕐᓂᒃ ᐅᕙᖓᓗ ᑖᓐᓇ ᓂᐅᕕᕈᒪᙱᓪᓗᒍ?
    ᓴᒃᑯᑦᑎᕙᓪᓕᐊᓂᕐᒥᒃ ᓄᓇᒥᒃ ᑭᒃᑯᑐᐃᓐᓇᓄᑦ, ᕼᐋᒻᓚᒃᑯᑦ ᑲᑎᒪᔨᖏᑦ ᐱᔭᒃᓴᖃᖅᐳᑦ ᑲᒪᖁᔭᐅᓗᑎᒃ ᐱᔭᐅᔭᕆᐊᓕᖕᓂᒃ ᓯᕗᓪᓕᖅᐸᐅᔾᔭᐅᓯᒪᔪᓂᒡᓗ ᓄᓇᓕᖕᓂᑦ ᐊᑐᕐᓗᑎᒡᓗ ᐊᔾᔨᒌᒃᑎᑦᑎᔪᓂᒃ ᐊᑕᐅᓰᓐᓇᒃᑰᖅᑐᓂᒡᓗ ᐊᑐᖅᑕᐅᕙᒃᑐᓂᒃ. ᓂᕈᐊᕐᓂᕆᔭᐅᔪᖅ “ᐊᖏᕐᓂᐅᒃᐸᑦ”, ᑲᑎᒪᔩᑦ ᐊᑐᖅᑎᑦᑎᓕᕈᓐᓇᙱᓚᑦ ᐃᓄᖕᒥᒃ ᓂᐅᕕᕆᐊᖃᖅᑎᓪᓗᒍ ᓄᓇᒥ ᐃᓂᒋᔭᒥᓂᒃ ᑖᓐᓇ ᐃᓄᒃ ᐱᔪᒪᙱᑉᐸᒃ ᐊᔪᖅᐸᓪᓘᓐᓃᑦ ᑕᐃᒪᐃᓕᐅᕆᐊᒃᓴᖅ.
  10. ᖃᓄᐃᒻᒪᑦ ᓂᐅᕕᕆᐊᖃᖅᐳᖓ ᓇᖕᒥᓂᖅ ᓄᓇᖁᑎᒋᓂᐊᖅᑕᓐᓂᒃ ᓄᓇᑖᖅᑎᑕᐅᕌᓂᓚᐅᖅᓯᒪᑎᓪᓗᑕ ᓄᓇᕘᒥᒃ ᓄᓇᑖᕐᓂᕐᒧᑦ ᐊᖏᖃᑎᒌᒍᑕᐅᓯᒪᔪᒃᑯᑦ?
    ᓄᓇᕘᒥᒃ ᓄᓇᑖᕐᓂᕐᒧᑦ ᐊᖏᖃᑎᒌᒍᑕᐅᓯᒪᔪᖅ ᓇᖕᒥᓂᖃᓕᖅᑎᑦᑎᕙᒃᐳᖅ ᓇᓕᐊᖕᓅᑕᐅᓯᒪᔪᓄᑦ ᓄᓇᓄᑦ ᓇᓗᓇᐃᖅᑕᐅᓯᒪᔪᓄᑦ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ. ᑕᒪᒃᑯᐊ ᐃᓄᖕᓂᑦ ᓇᖕᒥᓂᕆᔭᐅᓪᓗᑎᒃ ᓄᓇᑖᕆᔭᐅᓯᒪᔪᑦ ᐱᔭᐅᓯᒪᐃᓐᓇᐅᔭᕐᓂᐊᖅᐳᑦ ᐊᑐᖅᑕᐅᔪᒃᓴᐅᑕᐅᓪᓗᑎᒃ ᐱᕚᓪᓕᕈᑕᐅᔪᒃᓴᐅᑕᐅᓪᓗᑎᒡᓗ ᐃᓄᖕᓄᑦ. ᑖᓐᓇ ᐊᖏᖃᑎᒌᒍᑕᐅᓯᒪᔪᖅ ᐱᑎᑦᑎᒋᕗᖅᑕᐅᖅ ᓇᖕᒥᓂᖃᖅᑎᑦᑎᓕᕐᓂᕐᒥᒃ ᕼᐋᓪᓚᒃᑯᑦ ᓄᓇᒥ ᐃᓂᒃᓴᖁᑎᒋᔭᖏᓐᓂᒃ, ᕼᐋᒻᓚᒋᔭᐅᔪᑦ ᑭᒡᓕᒋᔭᖏᑦᑕ ᐃᓗᐃᓃᑦᑐᓂᒃ, ᓄᓇᓕᖕᓄᑦ ᒐᕙᒪᒋᔭᐅᔪᓄᑦ. ᑕᒪᓐᓇ ᓂᕈᐊᕐᓂᕆᔭᐅᔪᖅ ᐱᔾᔪᑎᖃᑐᐃᓐᓇᖅᐳᖅ ᕼᐋᒻᓚᒃᑯᑦ ᓄᓇᖁᑎᒋᔭᖏᓐᓂᒃ.
  11. “ᐊᖏᕐᓗᑎᒃ” ᓂᕈᐊᖅᑐᖃᖅᐸᑦ, ᑲᑎᒪᔩᑦ ᐋᖅᑭᒃᓯᒪᓕᖅᑎᑦᑎᔪᓐᓇᖅᐹᑦ ᓂᐅᕐᕈᑎᖃᕋᔭᕐᓂᕐᒥᒃ ᐃᓚᖏᓐᓂᒃ ᓄᓇᒥ ᐃᒡᓗᕐᔪᐊᒧᑦ ᐃᓂᒋᔭᐅᔪᓃᒃ ᐃᓚᖏᓐᓂᒡᓗ ᐊᑐᖅᑐᐊᖅᑎᑦᑎᓗᑏᒃ?
    ᐄ. ᕼᐋᒻᓚᒃᑯᑦ ᑲᑎᒪᔨᖏᑦ ᐋᖅᑭᒃᓯᒪᓕᖅᑎᑦᑎᓂᐊᖅᑐᑦ ᓇᓕᐊᒃ ᓄᓇᐃᑦ ᒪᓂᒪᑎᑕᐅᓕᕋᔭᕐᒪᖔᑕ ᓂᐅᕐᕈᑕᐅᔪᓐᓇᕐᓗᑎᒃ. ᕼᐋᒻᓚᒃᑯᑦ ᑲᑎᒪᔨᖏᑦ ᓂᕈᐊᕆᔭᖃᑐᐃᓐᓇᕆᐊᖃᕆᕗᑦᑕᐅᖅ ᐊᑐᖅᑐᐊᖅᑎᑦᑎᔪᒪᓗᑎᒃ ᓄᓇᓂᒃ ᐱᑐᐃᓐᓇᐅᙱᑦᑐᑎᑐᑦ ᖃᓄᐃᓕᖓᓂᕆᔭᐅᔪᑎᒍᑦ. ᓴᒃᑯᑦᑎᓂᐊᕐᓗᓂ ᓄᓇᒥᒃ ᑭᒃᑯᑐᐃᓐᓇᓄᑦ (ᐊᑐᖅᑐᐊᖅᑎᑦᑎᓂᒃᑯᑦ ᓂᐅᕐᕈᑎᖃᕐᓂᒃᑯᓪᓘᓐᓃᑦ), ᑲᑎᒪᔩᑦ ᑲᒪᒋᔭᒃᓴᖃᖅᐳᑦ ᐊᒃᑐᐊᓂᖃᖅᑎᑦᑎᓂᕐᒥᒃ ᐱᔭᐅᔭᕆᐊᓕᖕᓂᒃ ᓯᕗᓪᓕᖅᐸᐅᔾᔭᐅᓯᒪᔪᓂᒡᓗ ᓄᓇᓕᖕᓂᑦ ᐊᑐᕐᓗᑎᒡᓗ ᐊᔾᔨᒌᒃᑎᑦᑎᔪᓂᒃ ᐊᑕᐅᓰᓐᓇᒃᑰᖅᑐᓂᒡᓗ ᐊᑐᖅᑕᐅᕙᒃᑐᓂᒃ.
  12. ᐊᑭᖏᑦ ᓄᓇᒥ ᐃᒡᓗᕐᔪᐊᓄᑦ ᐃᓂᒋᔭᐅᔪᑦ ᐊᔾᔨᒌᒃᑲᔭᖅᐹᑦ ᓄᓇᓕᖕᓂᓕᒫᓃ?
    ᐊᑭᖏᑦ ᓄᓇᒥ ᐃᒡᓗᕐᔪᐊᓄᑦ ᐃᓂᒋᔭᐅᔪᑦ ᐊᔾᔨᒌᙱᑐᐃᓐᓇᕆᐊᖃᖅᐳᑦ ᓲᖃᐃᒻᒪ ᑲᑎᒪᔩᑦ ᐊᑐᕈᓐᓇᕐᒪᑕ ᐱᑐᐃᓐᓇᐅᙱᑦᑐᓂᒃ ᐃᓂᒧᑦ-ᑐᕌᖓᓪᓗᐊᑕᖅᑐᓂᒃ ᐱᔾᔪᑕᐅᔪᓂᒃ ᐃᓱᒪᒃᓴᖅᓯᐅᕈᑎᒋᓗᖏᑦ ᑕᒪᒃᑯᐊ ᐊᑐᓂᑦ ᓄᓇᒥ ᐃᒡᓗᕐᔪᐊᓄᑦ ᐃᓂᒋᔭᐅᔪᑦ ᐊᑭᓕᖅᓱᖅᑕᐅᓕᖅᐸᑕ. ᐃᓄᒧᑦ ᑐᕌᖓᓪᓗᐊᑕᖅᑐᑦ ᐱᔾᔪᑕᐅᔪᑦ ᐃᓚᖃᑐᐃᓐᓇᕆᐊᖃᖅᐳᑦ ᓇᓂᐅᓂᖓᓂᒃ, ᖃᓄᖅ ᐊᖏᑎᒋᓂᖓᓂᒃ, ᓯᕕᖓᓂᖓᓂᒃ ᐊᓯᖏᓐᓂᒡᓘᓐᓃᑦ ᐱᔾᔪᑕᐅᔪᓂᒃ. ᕼᐋᒻᓚᒃᑯᑦ ᑲᑎᒪᔨᖏᑦ ᐊᑭᑦᑐᕆᐊᖅᑎᑦᑎᔪᓐᓇᖅᐳᑦ ᐊᑭᑭᒡᓕᒋᐊᖅᑎᑦᑎᔪᓐᓇᖅᐳᓪᓘᓐᓃᑦ ᐊᑭᖏᓐᓂᒃ ᒪᓕᒡᓗᑎᒃ ᓄᓇᒥ ᐊᐅᓚᑦᑎᕝᕕᖃᖅᐸᖕᓂᕐᒧᑦ ᒪᓕᒐᕋᓛᕆᔭᒥᓂᒃ.
  13. “ᐊᖏᕐᓗᓂ” ᓂᕈᐊᖅᑐᖃᖅᐸᑦ ᐊᒃᑐᖅᓯᓇᔭᖅᐹ ᑭᙳᒻᒥᒐᖅᑕᐅᓯᒪᔪᒃᑯᑦ ᑭᒡᓕᒋᔭᐅᑎᑕᐅᔪᓃᒃ ᑕᕝᕙᓂ ᓄᓇᓕᐸᐅᔭᕐᒥ/ᕼᐋᒻᓚᒋᔭᐅᔪᒦ? ᐊᖏᕐᕋᒥᓂᒃ ᓇᖕᒥᓂᖃᖅᑎᐅᔫᑉ ᐱᔪᓐᓇᐅᑎᖏᑦ ᐊᓯᔾᔨᕋᔭᖅᐹᑦ?
    ᐋᒃᑲ. ᕼᐋᒻᓚᒃᑯᑦ ᑲᑎᒪᔨᖏᑦ ᓱᓕ ᐊᑐᕈᓐᓇᕋᔭᖅᐳᑦ ᐊᑐᖅᑎᑦᑎᓪᓚᕆᒡᓗᑎᒃ ᕿᙳᒻᒥᒐᖅᑕᐅᓯᒪᔪᓄᑦ ᑭᒡᓕᒋᔭᐅᔪᓄᑦ ᒪᓕᒐᕋᓛᕆᔭᒥᓂᒃ ᐊᐅᓚᑦᑎᔪᒪᓗᑎᒃ ᐱᕙᓪᓕᐊᑎᑕᐅᓂᖏᓐᓄᑦ ᑕᒪᐃᑕ ᓄᓇᒥ ᐃᒡᓗᕐᔪᐊᓄᑦ ᐃᓂᒋᔭᐅᔪᓕᒫᑦ, ᑭᒃᑯᑐᐃᓐᓇᓄᑦ ᐃᓛᒃᑰᖅᑐᓄᓪᓗ, ᕼᐋᒻᓚᒃᑯᑦ ᑭᒡᓕᒋᔭᖏᑕ ᐃᓗᐊᓂ.
  14. ᑭᒃᑯᑦ ᓄᓇᒥᒃ ᓂᐅᕐᕈᑎᖃᕈᓐᓇᖅᐸᑦ?
    ᓄᓇᒥᒃ ᐱᖃᕐᓂᕐᒧᑦ ᐱᖁᔭᖅ ᐱᑕᖃᙱᓚᖅ ᐊᕐᕌᒍᓂᒃ ᐃᓱᓕᑦᑕᕐᕕᐅᓇᔭᖅᑐᓂᒃ ᓄᓇᒥᒃ ᓇᖕᒥᓂᖃᕐᓂᐊᕐᓗᓂ, ᑭᓯᐊᓂᑦᑕᐅᖅ, ᐊᕐᕌᒍᖃᕆᐊᖃᖅᐳᑎᑦ 19−ᓂᒃ ᓂᐅᕐᕈᑎᖃᕈᓐᓇᕈᒪᒍᕕᑦ, ᐱᑖᕆᕙᓪᓕᐊᓗᒍ ᐃᒡᓗᕐᔪᐊᒥᒃ ᐊᑭᓕᖅᓱᐃᔪᒪᒍᕕᑦ ᓅᑎᑦᑎᔪᒪᒍᕕᓪᓘᓐᓃᑦ ᓄᓇᒥᒃ.
  15. ᑭᒃᑯᑦ ᑲᒪᒋᔭᒃᓴᖃᕋᔭᖅᐸᑦ ᓅᑎᑦᑎᓂᕐᒥᒃ ᓇᖕᒥᓂᖃᖅᑐᖃᓕᕐᓂᖓᓄᑦ ᒪᓕᒐᑎᒎᖓᔪᓄᓪᓗ ᐊᑭᓕᖅᓱᒐᒃᓴᓄᑦ?
    ᓅᑎᑦᑎᓂᖅ ᓇᖕᒥᓂᕆᔭᐅᓂᐊᓕᖅᑐᒥᒃ ᑲᒪᒋᔭᒃᓴᕆᔭᐅᓇᔭᖅᐳᖅ ᓂᐅᕕᖅᑎᑦᑎᔪᒧᑦ, ᕼᐋᒻᓚᒋᔭᐅᔪᒧᑦ ᓄᓇᒥᒡᓗ ᐱᖃᕐᓂᕐᒧᑦ ᑎᑎᕋᕐᕕᒋᔭᐅᔪᒧᑦ. ᑕᐃᓐᓇ ᓂᐅᕕᖅᑐᖅ ᑲᒪᒋᔭᒃᓴᖃᓕᕋᔭᖅᐳᖅ ᖃᓄᑐᐃᓐᓇᖅ ᓅᑎᑦᑎᓂᕐᒧᑦ ᐊᑭᓕᖅᓱᕆᐊᓕᖕᓄᑦ, ᐱᖁᔭᑎᒍᑦ ᐊᑭᓕᖅᓱᕆᐊᓕᖕᓄᑦ, ᐊᐅᓚᑦᑎᓂᕐᒧᓪᓗ ᐊᑭᓕᖅᓱᕆᐊᓕᖕᓄᑦ.
  16. ᑭᖑᓂᑦᑎᓐᓂ ᐊᑐᖅᑐᐊᕐᓂᕐᒧᑦ ᐊᑭᓕᖅᓲᑕᐅᓂᑯᑦ ᐊᑐᖅᑕᐅᔪᓐᓇᖅᐹᑦ ᐊᑭᖓᓄᑦ ᓂᐅᕕᕐᓂᐊᕐᓗᓂ ᑖᔅᓱᒥᖓ ᓄᓇᒥᒃ ᐃᒡᓗᕐᔪᐊᕐᒧᑦ ᐃᓂᒋᔭᐅᔪᒥᒃ ᓂᐅᕕᕈᒫ?
    ᐄ. ᑖᓐᓇ ᐊᑐᖅᑐᐊᖅᑎ ᐃᓕᕙᓪᓕᐊᓯᒪᔭᒥᓂᑦ ᓇᖕᒥᓂᖃᕐᓂᕐᒧᑦ ᐊᑭᓕᖅᓲᑎᒋᔭᒥᓂᒃ ᐊᑐᕈᓐᓇᕋᔭᖅᐳᑦ ᓂᐅᕕᕐᓂᕐᒧᑦ ᑖᔅᓱᒥᖓ ᓄᓇᒥ ᐃᒡᓗᕐᔪᐊᒧᑦ ᐃᓂᒥᒃ. ᐃᓄᖕᓄᑦ ᐊᑐᖅᑐᓄᑦ ᑭᒃᑯᑐᐃᓐᓇᓂᑦ ᐊᑐᖅᑐᐊᕐᓂᕐᒧᑦ ᐊᑐᖅᑕᐅᕙᒃᑐᓂᒃ, ᑭᖑᓂᑦᑎᓐᓂ ᐊᑐᖅᑐᐊᕐᓂᕐᒧᑦ ᐊᑭᓕᐅᑕᐅᓂᑯᑦ ᐊᑐᖅᑕᐅᔪᓐᓇᕋᔭᖅᐳᑦ ᓂᐅᕕᕐᓂᕐᒧᑦ ᓄᓇᒥᒃ ᒪᓕᒃᑐᖃᕐᓗᓂ ᕼᐋᒻᓚᒃᑯᑦ ᓄᓇᒥᒃ ᐊᐅᓚᑦᑎᕝᕕᖃᕐᓂᕐᒧᑦ ᒪᓕᒐᕋᓛᕆᔭᐅᔪᒥᒃ.
  17. ᑭᓲᕙᑦ ᑮᓇᐅᔭᑎᒍᑦ ᐊᑐᖅᓯᓂᕆᔭᐅᓇᔭᖅᑐᑦ ᐊᑐᖅᑐᐊᕐᓂᕐᒥᒃ ᓄᓇᒥᒃ?
    ᒫᓐᓇᐅᔪᖅ ᐊᑐᖅᑕᐅᒐᔪᒃᐸᒃᑑᕐ ᐊᔾᔨᖓᓂᒃ ᐊᑐᖅᑐᐊᕈᕕᑦ, (ᐊᕐᕌᒍᑕᒫᑦ ᐊᑭᓕᖅᓱᐃᕙᒡᓗᑎᑦ) ᐊᑭᓖᖃᑦᑖᓂᒃᐳᑎᑦ ᐊᑭᓕᒐᒃᓴᒥᒃ ᐊᑐᕐᓂᕐᓄᑦ ᓄᓇᒥ ᐃᒡᓗᕐᔪᐊᒧᑦ ᐃᓂᒋᔭᐅᔪᒥᒃ. ᐃᓱᓕᑉᐸᑦ ᐊᑐᖅᑐᐊᓂᕐᒧᑦ ᐊᑐᕆᐊᖃᖅᑕᐃᑦ, ᑕᒪᕐᒥᑦᑎᐊᖅ ᐊᑭᓕᕆᐊᓖᑦ ᐊᑭᓕᖅᑕᕕᓂᖅᑎᑦ ᓄᓇᒥᒃ ᓇᖕᒥᓂᖃᖅᑐᒦᓐᓇᔭᖅᐳᑦ.
  18. ᑭᓲᕙᑦ ᑮᓇᐅᔭᑎᒍᑦ ᐊᑐᖅᓯᓂᕆᔭᐅᓇᔭᖅᑐᑦ ᓂᐅᕕᕐᓂᕐᒥᒃ ᓄᓇᒥᒃ?
    ᐱᑕᖃᖅᐸᒌᖅᑐᒥᒃ ᓇᖕᒥᓂᖃᕈᑎᖃᕐᓂᕐᒧᑦ ᐊᑐᖅᑐᐊᕈᕕᑦ ᐅᕝᕙᓘᓐᓃᑦ ᓯᕗᓂᒃᓴᒥ ᓄᓇᒥᒃ ᓂᐅᕕᕈᓐᓇᓛᕈᕕᑦ, ᐊᑭᓕᐅᑎᒋᔭᕕᓂᖅᑎᑦ ᑖᔅᓱᒧᖓ ᓄᓇᒥ ᐃᒡᓗᕐᔪᐊᕐᓄᑦ ᐃᓂᖕᓄᑦ ᐊᑐᖅᑕᐅᓕᕈᓐᓇᖅᐸᒃᐳᑦ ᓇᖕᒥᓂᖃᕈᑎᖕᓄᑦ (ᐊᑭᖓᓄᑦ) ᑖᔅᓱᒧᖓ ᓄᓇᒧᑦ. ᓂᐅᕐᕈᑎᒋᒍᕕᐅᒃ ᐊᖏᕐᕋᕆᔭᐃᑦ ᐃᓚᓕᐅᑎᔪᓐᓇᕋᔭᖅᐸᐃᑦ ᐊᑭᖓ ᓄᓇᐅᑉ ᓂᐅᕐᕈᑎᒋᔭᕕᑦ ᐊᑭᐊᓄᑦ, ᓂᐅᕐᕈᑎᒋᓂᐊᖅᑕᕕᒃ ᐊᑭᖓᓄᑦ ᐃᒡᓗᕐᔪᐊᑉ.
  19. ᓇᖕᒥᓂᖃᕐᓂᖅ ᓄᓇᒥᒃ ᑐᑭᖃᖅᐹ ᐱᔪᓐᓇᐅᑎᖃᒃᑲᓐᓂᕐᓂᕐᓃᒃ ᑭᓱᓕᒫᓄᑦ ᓄᓇᐅᕐ ᐃᑭᐊᖓᓃᑦᑐᓅᑦ (ᖄᖓᓃᙱᑦᑐᓄᑦ ᐱᔪᓐᓇᐅᑎᖃᕐᓂᖅ).
    ᐋᒃᑲ. ᑕᒪᕐᒥᒃ ᓇᖕᒥᓂᕆᔭᐅᔪᖅ ᐊᑐᖅᑐᐊᖅᑕᐅᔪᕐᓗ ᓄᓇ ᐱᑎᑦᑎᔪᓐᓇᖅᐳᒃ ᖄᑦᑕᐃᓐᓇᖓᓄᑦ ᐱᔪᓐᓇᐅᑎᓂᒃ. ᓇᖕᒥᓂᖃᕐᓂᖅ ᐃᓚᖃᙱᓚᖅ ᓄᓇᐅᕐ ᐃᑭᐊᖓ ᓃᑦᑐᓄᑦ ᐱᔪᓐᓇᐅᑎᖃᕐᓂᕐᒥᒃ ᓄᓇᒥᓪᓗ ᐱᑖᕆᔭᐅᔪᓐᓇᖅᐸᒃᑐᓄᑦ.
  20. ᓇᖕᒥᓂᖃᕐᓂᖅ ᓄᓇᒥᒃ, ᐊᑐᖅᑐᐊᙱᖔᕐᓗᒍ, ᐊᓯᔾᔨᖅᓯᕚ ᑭᓇ ᑲᒪᒋᔭᒃᓴᖃᕐᒪᖔᑦ ᐅᖅᓱᐊᓗᖕᒥᒃ ᑯᕕᔪᓂᒃ ᑕᕝᕙᓂ ᐃᓂᒋᔭᐅᔪᒦ?
    ᐋᒃᑲ. ᑭᒃᑯᑐᐃᓐᓇᓄᑦ ᐊᑐᖅᑕᐅᕙᒃᑐᖅ ᐅᓇᐅᕗᖅ, ᑖᓐᓇ ᓱᕈᖅᑎᑦᑎᔪᖅ ᐊᑭᓖᔭᕆᐊᖃᖅᐳᖅ ᓴᓗᒻᒪᖅᓴᐃᓗᓂᓗ ᖃᓄᑐᐃᓐᓇᖅ ᓱᕈᖅᑎᖅᑕᐅᔪᓂᒃ. ᐊᑐᓂᑦ ᓇᖕᒥᓂᖅ ᖃᓄᐃᓕᖓᓂᕆᔭᐅᔪᑦ ᖃᐅᔨᓴᖅᑕᐅᔭᕆᐊᖃᕋᔭᖅᐳᑦ ᐃᓛᒃᑰᖅᑕᐅᕙᒡᓗᑎᒃ.
  21. ᒪᓕᒐᕋᓛᓂᒃ ᐊᓯᔾᔨᖅᑐᖃᕆᐊᖃᕋᔭᖅᐹ ᑕᒪᒃᑯᐊ ᕼᐋᒻᓚᒋᔭᐅᔪᑦ ᐱᑎᑕᐅᒃᐸᑕ ᓂᐅᕐᕈᑎᖃᕈᓐᓇᕐᓂᕐᒥᒃ ᓄᓇᒦᒃ?
    ᓄᓇᓕᖕᓂ ᒐᕙᒪᒃᑯᓐᓂᓗ ᐱᔨᑦᑎᕋᖅᑎᒃᑯᑦ, ᒪᓕᒐᓕᕆᔨᒃᑯᑦ ᕼᐋᒻᓚᒋᔭᐅᔪᓪᓗ ᕿᒥᕐᕈᐊᒃᑲᓐᓂᕆᐊᖃᖅᐳᑦ ᒪᓕᒐᕋᓛᓂᒃ ᐅᖃᐅᔾᔨᓗᑎᒡᓗ ᕼᐋᒻᓚᒃᑯᑦ ᑲᑎᒪᔨᖏᓐᓂᒃ ᑭᓱᓂᒃ ᐊᓯᔾᔨᖅᑐᖃᕆᐊᖃᕋᔭᕐᒪᖔᑦ. ᓄᓇᒥᒃ ᐊᐅᓚᑦᑎᕝᕕᖃᕐᓂᕐᒧᑦ ᒪᓕᒐᕋᓛᑦ ᕿᒥᕐᕈᐊᖅᑕᐅᒃᑲᓐᓂᕆᐊᖃᕋᔭᖅᐳᑦ ᓄᑖᙳᕆᐊᖅᑎᑕᐅᓗᑎᒡᓗ. ᓄᓇᓕᖕᓂ ᐱᕙᒌᔭᖅᑕᐅᓯᒪᔪᑦ ᓄᓇᓕᖕᓂᓗ ᑭᒡᓕᒋᑎᑕᐅᔪᓄᑦ ᒪᓕᒐᕋᓛᑦ ᓄᑖᙳᕆᐊᖅᑎᑕᐅᑐᐃᓐᓇᕆᐊᖃᕋᔭᖅᐳᑦ, ᑭᓯᐊᓂᑦᑕᐅᖅ ᑕᒪᒃᑯᐊ ᐊᓯᔾᔨᕐᓂᕆᔭᐅᔪᑦ ᓂᕆᐅᒋᔭᐅᕗᑦ ᒥᑭᑦᑑᓂᐊᕋᓱᒋᔭᐅᓪᓗᑎᒃ ᐊᖏᔪᒃᑯᓪᓗ ᐊᒃᑐᖅᓯᓇᔭᕋᑎᒃ ᓄᓇᒥᒃ ᐱᕙᓪᓕᐊᑎᑦᑎᓂᕆᔭᐅᔪᒥᒃ. ᓄᑖᒥᒃ ᒪᓕᒐᕋᓛᒥᒃ ᐊᐅᓚᑦᑎᔾᔪᑕᐅᓂᐊᖅᑐᒥᒃ ᐊᒡᒍᖅᑐᖅᑕᐅᒃᑲᓐᓂᕐᓂᖓᓄᑦ ᓄᓇᐅᑉ ᐱᔭᐅᔭᕆᐊᖃᑐᐃᓐᓇᕆᐊᖃᖅᐳᖅ. ᕼᐋᒻᓚᒃᑯᑦ ᑲᑎᒪᔨᖏᑦ ᑲᔪᓯᑎᑦᑎᓂᐊᖅᐳᑦ ᑭᒃᑯᑐᐃᓐᓇᓂᒃ ᑲᑎᒪᑎᑦᑎᓂᕆᔭᐅᔪᓂᒃ ᐅᖃᖃᑎᖃᕈᒪᓗᑎᒃ ᓄᓇᓕᖕᒥᐅᓂᒃ ᓇᓕᐊᖕᓄᑐᐃᓐᓇᖅ ᐊᓯᔾᔨᖅᑕᐅᔪᒪᔪᓄᑦ ᒪᓕᒐᕋᓛᓄᑦ.
  22. “ᐊᖏᖅᑐᑦ” ᓂᕈᐊᕐᓗᑎᒃ ᓵᓚᒃᓴᖅᐸᑕ ᓱᕐᕋᐃᓂᖃᕐᓂᐊᖅᐹ ᐊᖑᓇᓱᒍᓐᓇᐅᑎᑦᑎᓂ ᐃᖃᓗᒐᓱᒍᓐᓇᐅᑎᑦᑎᓂᒡᓗ?
    ᐋᒃᑲ. ᒧᓂᓯᐹᓕᑎᒃᑯᑦ ᑲᔪᓯᑎᑦᓯᑎᐊᓚᖅᑐᑦ ᓄᓇᐃᑦ ᓂᐅᕐᕈᑕᐅᔪᑦ ᐊᒃᑐᐃᓂᖃᔾᔭᖏᓐᓂᖏᓐᓂᒃ ᑭᒃᑯᑐᐃᓐᓇᕐᓄᑦ ᐅᐸᒃᑕᐅᕙᒃᑐᓂᒃ ᐃᓕᖅᑯᓯᑐᖃᕐᒨᓕᖓᔪᑦ ᐅᐸᒃᑕᐅᓲᑐᖃᕐᓂᒃ ᐊᒻᒪᓗ ᐊᖑᓇᓱᒡᕕᐅᓲᓂᒃ. ᓱᓕᒋᐊᓪᓚᒃ ᓄᓇᐃᑦ ᓯᒡᔭᒦᑐᑦ 100 ᐃᓯᒐᓪᓗᐊᒥᒃ ᖃᓂᓐᓂᓖᑦ ᓯᒡᔭᒧᑦ ᓂᐅᕐᕈᑕᐅᔪᓐᓇᖏᓐᓂᖏᓂᒃ. ᑕᕆᐅᑉ, ᑕᓰᑦ ᐊᒻᒪᓗ ᑰᑦ ᐅᐸᒃᑕᐅᔪᓐᓇᕐᓂᖏᑦ ᓴᐳᒻᒥᔭᐅᔾᔪᑎᖃᕐᒪᑕ.
  23. ᖃᓄᖅ ᑖᓐᓇ ᓂᕈᐊᕐᓂᖅ ᓱᕐᕋᐃᓂᖃᕐᓂᐊᖅᐸ ᐃᒡᓗᕋᓛᖃᕐᕕᐅᔪᓂᒃ ᒧᓂᓯᐹᓕᑎᒃᑯᑦ ᓄᓇᖁᑎᖏᓐᓂᑐᓄᑦ?
    ᑖᓐᓇ ᓂᕈᐊᕐᓂᖅ ᓱᕐᕋᐃᓂᖃᔾᔭᖏᑦᑐᖅ ᓄᓇᓖᑦ ᐊᐅᓚᑦᓯᓂᕆᔭᖏᓐᓂᒃ ᐃᒡᓗᕋᓛᖃᕐᕕᐅᔪᓂᒃ.
  24. ᑲᑎᒪᔩᑦ ᐃᓱᒪᓕᐅᕆᖃᑕᐅᔪᓐᓇᖅᐹᑦ ᓄᓇᑖᕈᓐᓇᕐᓂᕐᒧᑦ ᓂᕈᐊᖅᑎᑦᓯᓂᕐᒥᒃ?
    ᐄ ᐃᓱᒪᓕᐅᕆᖃᑕᐅᔪᓐᓇᖅᑐᑦ ᐅᕝᕙᓘᓐᓃᑦ ᐃᓚᐅᖏᑦᑐᓐᓇᖅᑐᑦ.
  25. ᖃᓄᖅ ᐋᖅᑭᒃᓯᒪᓕᖅᑎᑦᑎᓂᖅ ᓂᐅᕐᕈᑎᖃᕈᒪᓂᖅ ᐱᖁᑎᒥᒃ ᐊᒃᑐᖅᓯᓇᔭᖅᐸᑦ ᑲᑎᖅᓱᖅᓯᒪᔪᓂ ᓇᖕᒥᓂᖃᖃᑦᑕᐅᕙᒃᑐᓂᒃ?
    ᑲᑎᖅᓱᖅᓯᒪᔪᓂ ᓇᖕᒥᓂᕆᔭᐅᔪᖅ ᓂᐅᕐᕈᑕᐅᒑᖓᑦ, ᐃᒡᓗᕐᔪᐊᑐᐊᖅ ᓂᐅᕐᕈᖅᑕᐅᕙᒃᐳᖅ, ᓄᓇᖓᐅᙱᑦᑐᖅ. ᑭᓯᐊᓂᑦᑕᐅᖅ, ᑲᑎᖅᓱᖅᓯᒪᔪᒧᑦ ᑯᐊᐳᕇᓴᕆᔭᐅᔪᖅ ᐊᓯᔾᔨᖅᓯᑐᐃᓐᓇᕆᐊᖃᖅᐳᑦ ᐊᑐᖅᑐᐊᕐᓂᕆᔭᒥᓂᒃ ᓇᖕᒥᓂᖅᑖᕆᕙᓪᓕᐊᓪᓗᒍ (ᓄᓇᒥᒃ ᓇᖕᒥᓂᖃᕐᓂᕐᒥᒃ).
  26. ᐊᓯᔾᔨᖅᑐᖃᕐᓂᐊᖅᐹ ᓄᓇᒥ ᑭᒡᓕᒋᔭᐅᔪᓄᑦ ᒪᓕᒋᐊᖃᖅᐸᒃᑐᓅᑦ?
    ᒥᑭᑦᑐᓂᒃ ᐊᓯᔾᔨᖅᑐᖃᑐᐃᓐᓇᕆᐊᖃᖅᐳᖅ ᓄᓇᒥ ᑭᒡᓕᒋᔭᐅᔪᓄᑦ ᒪᓕᒋᐊᖃᖅᐸᒃᑐᓄᑦ. ᓄᓇᓕᖕᓂ ᒐᕙᒪᒃᑯᓐᓂᓗ ᐱᔨᑦᑎᕋᖅᑎᒃᑯᑦ ᕿᒥᕐᕈᐊᒃᑲᓐᓂᕐᓂᐊᖅᐳᑦ ᒪᓕᒐᕋᓛᓂᒃ ᖃᐅᔨᒪᓕᕈᒪᓗᑎᒃ ᖃᓄᑐᐃᓐᓇᖅ ᐊᓯᔾᔨᖅᑐᖃᕆᐊᖃᖃᔭᕐᒪᖔᑦ. ᓂᕆᐅᒋᔭᐅᔪᖅᑕᖃᖅᐳᖅ ᑕᒪᒃᑯᐊ ᐊᓯᔾᔨᕐᓂᕆᔭᐅᔪᑦ ᒥᑭᓐᓂᕐᓂᖏᓐᓂᒃ ᐊᖏᔪᒃᑯᓪᓗ ᐊᒃᑐᖅᓯᙱᓪᓗᑎᒃ ᓄᓇᒥᒃ ᐱᕙᓪᓕᐊᑎᑦᑎᓂᕆᔭᐅᔪᒥᒃ.
  27. ᓇᖕᒥᓂᖃᕐᓂᖅ ᓄᓇᒥᒃ ᐊᑐᖅᑐᐊᙱᖔᕐᓗᒍ ᐊᓯᔾᔨᖅᓯᑐᐃᓐᓇᕆᐊᓕᒃ ᖃᓄᖅ ᐃᓄᐃᑦ ᐃᓱᒪᒋᔭᖃᕐᒪᖔᑕ ᓄᓇᒥᒃ ᐃᓂᒋᔭᒥᓂᒃ. ᓄᓇᓕᖕᒥᐅᑦ ᐊᖏᓂᖅᓴᒥᒃ ᐅᖃᕈᒪᑐᐃᓐᓇᕆᐊᖃᖅᐳᑦ ᖃᓄᖅ ᐊᓯᑎᒃ ᐊᑐᖅᐸᖕᒪᖓᑕ ᓄᓇᒥᒃ ᓄᓇᒥ ᐃᒡᓗᔪᐊᓄᑦ ᐃᓂᒋᔭᒥᓂᒃ ᓇᖕᒥᓂᕆᔭᒥᓂᒃ. ᓄᓇᒥ ᑭᒡᓕᒋᔭᐅᔪᓄᑦ ᒪᓕᒐᕋᓛᑦ ᐊᓯᔾᔨᑐᐃᓐᓇᕆᐊᖃᖅᐳᑦ ᐊᒃᑐᐊᓂᖃᖁᓪᓗᒋᑦ ᑕᒪᒃᑯᓄᖓ ᐊᔾᔨᒌᙱᑦᑐᓄᑦ ᐃᓱᒪᒋᔭᐅᔪᓄᑦ ᓄᓇᐅᑉ ᐊᑐᖅᑕᐅᕙᖕᓂᖓᓄᑦ.

  28. ᓂᐅᕕᕈᓐᓇᖅᐳᖔ ᓄᓇᒥᒃ ᐃᒡᓗᕐᔪᐊᒧᑦ ᐊᓂᒋᔭᓐᓃᒃ ᐱᓯᒪᓗᒍᓗ ᓯᕗᓂᒃᓴᒥ ᐱᕙᓪᓕᐊᑎᒃᑕᒃᓴᕆᔪᒪᓗᒎ?
    ᓄᓇᓕᖕᓂ ᓄᓇᒥᒃ ᐊᐅᓚᑦᑎᓂᕐᒧᑦ ᒪᓕᒐᕋᓛᑦ ᓄᓇᕘᓪᓗ ᒐᕙᒪᖓᑕ ᓄᓇᒧᑦ ᐊᑐᐊᒐᖏᑦ ᐅᖃᖅᓯᒪᕗᑦ ᐱᔭᕇᖅᓯᔭᕆᐊᖃᕐᓂᕐᓂᒃ ᐃᒡᓗᓕᐅᕐᓂᕐᒥᒃ ᓄᓇᒥ ᐃᒡᓗᕐᔪᐊᕐᒧᑦ ᐃᓂᒋᔭᕐᓂ ᐊᕐᕌᒎᒃ ᒪᕐᕉᒃ ᐃᓗᐊᓂ, ᐅᕝᕙᓘᓐᓃᑦ 3−ᓄᑦ ᐊᕐᕌᒍᓄᑦ ᐅᖓᕙᕆᐊᖅᑎᑦᑎᓂᖅ ᐊᖏᖅᑕᐅᒃᐸᑦ ᕼᐋᒻᓚᒃᑯᑦ ᑲᑎᒪᔨᖏᓐᓂᒃ. ᑕᒪᓐᓇ ᐊᑐᖅᑕᐅᔭᕆᐊᓕᒃ ᑕᐃᒪᐃᔾᔪᑎᖃᖅᐳᖅ ᐊᑐᖅᑐᐊᖅᓯᓂᕐᒧᑦ ᐊᑐᖅᑕᐅᕙᒃᖢᓂᓗ ᕼᐋᒻᓚᒃᑯᑦ ᑲᑎᒪᔨᖏᓐᓂᑦ ᐱᓇᔪᖁᔨᙱᓐᓂᕐᒧᑦ ᓄᓇᒥᒃ ᓂᐅᕕᐊᓪᓚᓚᐅᕐᓗᓂ ᐊᑭᑦᑐᖅᐸᓕᐊᓇᔭᕋᓱᒋᔭᐅᓂᖓᓂᒃ. ᓄᓇᒥᒃ ᐊᑭᑦᑐᖅᐸᓪᓕᐊᓂᐊᕋᓱᒋᓂᖅ ᑐᑭᖃᖅᐳᖅ ᑕᒪᓐᓇ ᓄᓇ ᐋᖅᑭᒃᓱᖅᑕᐅᕙᓪᓕᐊᓯᒪᙱᓐᓂᖓᓂᒃ ᐱᔭᐅᓯᒪᑐᐃᓐᓇᖅᖢᓂᓗ ᑭᓯᐊᓂ ᑖᓐᓇ ᓇᖕᒥᓂᖃᖅᑎ ᑮᓇᐅᔭᓕᐅᕈᓐᓇᖅᓯᓐᓂᖅᐸᑦ ᓂᐅᕐᕈᑎᖃᕐᓂᕐᒥᓄᑦ ᑖᔅᓱᒥᖓ. “ᐊᖏᖅᑐᖃᕐᓗᓂ” ᓂᕈᐊᖅᑐᖃᖅᐸᑦ, ᑕᒪᒃᑯᐊ ᓄᓇᐃᑦ ᓂᐅᕐᕈᑕᐅᓇᔭᖅᐳᑦ ᐱᑕᖃᕋᔭᕋᓂᓗ ᐊᑐᖅᑐᐊᕐᓂᕐᒧᑦ ᐊᖏᖃᑎᒌᒍᑕᐅᓯᒪᔪᒥᒃ ᑕᒪᓐᓇ ᐊᑐᕆᐊᓕᒃ ᐊᑐᖅᑎᓪᓚᕆᒐᓱᒡᓗᒍ ᕼᐋᒻᓚᒃᑯᑦ ᓄᓇᖁᑎᒋᔭᖓᓂ. ᐊᑐᖅᑕᐅᔪᓐᓇᖅᑐᑦ ᕼᐋᒻᓚᒋᔭᐅᔪᑦ ᑲᑎᒪᔨᖏᑦ ᐊᑐᕈᓐᓇᖅᑕᖏᑦ ᓇᓗᙱᑦᑎᐊᕈᒪᓂᕐᒧᑦ ᑕᒪᓐᓇ ᓄᓇ ᐱᕙᓐᓕᐊᑎᑕᐅᒐᓗᐊᕐᒪᖔᑦ ᐱᔭᐅᓯᒪᑐᐃᓐᓇᙱᖦᖢᓂᓗ ᓂᐅᕐᕈᑕᐅᓛᖅᖢᓂᓗ ᓯᕗᓂᒃᓴᒥ ᐅᓪᓗᒥ ᑮᓇᐅᔭᓕᐅᕈᑕᐅᓗᓂ ᑕᒪᓐᓇᓗ ᕿᒥᕐᕈᐊᖅᑕᐅᔭᕆᐊᖃᓛᖅᖢᓂ ᓄᓇᓕᖕᓂ ᒐᕙᒪᒃᑯᓐᓂᓗ ᐱᔨᑦᑎᕋᖅᑎᒃᑯᓐᓂᑦ ᒪᓕᒐᓕᕆᔨᒃᑯᓐᓂᓪᓗ.
  29. ᖃᐅᔨᓴᕐᓂᕆᔭᐅᔪᑦ ᑲᔪᓯᑎᑕᐅᔭᕆᐊᖃᕋᔭᖅᐹᑦ ᑕᐃᓐᓄᑦ ᓄᓇᒥ ᐃᒡᓗᕐᔪᐊᒥᓄᑦ ᐃᓂᖁᑎᒋᔭᐅᔪᓅᑦ? ᑭᒃᑯᑦ ᐊᑭᓖᓇᔭᖅᐸᑦ ᑕᒪᑐᒧᖓ ᖃᐅᔨᓴᕐᓂᕆᔭᐅᔪᒧᑦ? ᖃᓄᕐᓕ ᐱᒋᔭᐅᔪᐃᑦ ᑭᒡᓕᖏᑦ ᓇᓗᓇᐃᒃᑯᑦᑎᖅᑕᐅᓯᒪᓇᔭᖅᐸᑦ?
    ᓄᓇᒥ ᐃᒡᓗᕐᔪᐊᓄᑦ ᐃᓂᒃᓴᐃᑦ ᓂᐅᕐᕈᑕᐅᔪᓐᓇᖅᑐᑐᐊᑦ ᒪᑯᐊᖑᕗᑦ, ᕼᐋᓪᓚᒃᑯᑦ ᐱᒋᔭᖏᑦ ᓄᓇᒥ ᐃᒡᓗᕐᔪᐊᓄᑦ ᐃᓂᒋᔭᐅᔪᑦ. ᐱᓯᒪᔪᒪᓕᕈᒪᓗᓂ ᐊᑭᓖᓂᕐᒧᑦ ᓇᖕᒥᓂᖃᓪᓚᕆᖕᓂᕋᖅᑕᐅᔪᒪᓂᖅ ᓄᓇᒥ ᐃᒡᓗᕐᔪᐊᒧᑦ ᐃᓂᒋᔭᐅᔪᒥᒃ, ᑖᓐᓇ ᒪᓕᒐᑎᒎᖓᔪᒃᑯᑦ ᕿᙳᒻᒥᒐᖅᑕᐅᔭᕆᐊᖃᖅᐳᖅ ᕿᙳᒻᒥᒐᖅᑕᐅᓂᖓᓄᓪᓗ ᐱᕙᒌᔭᖅᑕᐅᓯᒪᓂᖓ ᓇᓗᓇᐃᔭᖅᑕᐅᓯᒪᔭᕆᐊᖃᖅᐳᖅ ᓄᓇᒥᒃ ᐱᖃᕐᓂᕐᒧᑦ ᑎᑎᕋᕐᕕᒋᔭᐅᔪᒥ. ᑕᒪᕐᒥᑲᓴᑦᑎᐊᖅ ᐊᑐᖅᑐᐊᖅᑕᐅᓯᒪᔪᑦ ᓄᓇᒥ ᐃᒡᓗᕐᔪᐊᓄᑦ ᐃᓂᒋᔭᐅᔪᑦ ᕼᐋᒻᓚᒋᔭᐅᔪᓂ ᐱᔭᕇᖅᑕᐅᓯᒪᕙᒌᕋᔭᖅᐳᑦ ᒪᓕᒐᑎᒍᑦ ᕿᙳᒻᒥᒐᖅᑕᐅᓯᒪᓗᑎᒃ ᐱᒋᔭᐅᓂᕋᖅᑕᐅᓯᒪᓗᑎᒡᓗ ᕼᐋᒻᓚᒋᔭᐅᔪᒧᑦ. ᕼᐋᒻᓚᐃᑦ ᑲᒪᒋᔭᒃᓴᖃᖃᑦᑕᖅᓯᒪᕗᑦ ᓄᓇᒥᒃ ᐱᕙᓪᓕᐊᑎᑦᑎᓂᕐᒥᒃ 1996−ᖑᓚᐅᕐᓂᖓᓂᒃ. ᓄᓇᒥᒃ ᐱᕙᓪᓕᐊᑎᑦᑎᓂᕐᒧᑦ ᐊᑭᒋᔭᐅᔪᑦ ᐃᓚᖃᖅᐳᑦ ᒪᓕᒐᑎᒍᑦ ᕿᙳᒻᒥᒐᖅᓯᓂᕐᒧᑦ ᐊᑭᓂᒃ.
  30. “ᐊᖏᖅᑐᖃᕐᓗᓂ” ᓂᕈᐊᖅᑐᖃᖅᐸᑦ, ᓄᓇᒥ ᐃᒡᓗᕐᔪᐊᓄᑦ ᐃᓂᒋᔭᐅᔪᑦ ᑭᒡᓕᖏᑦ ᓴᓂᓕᕇᓄᑦ ᐊᑕᖃᑦᑕᐅᑎᓪᓗᑎᒃ ᐊᓯᔾᔨᕋᔭᖅᐹᑦ?
    ᐋᒃᑲ. ᐊᓯᔾᔨᖅᑐᖃᕋᔭᙱᑦᑐᖅ ᐋᖅᑭᒃᓯᒪᓕᖅᑎᑦᑎᔪᒪᓗᓂ ᑭᒡᓕᒋᓐᓂᒃ ᑕᒪᒃᑯᓄᖓ ᓴᓂᓕᕇᓄᑦ ᐊᑕᖃᑦᑕᐅᑎᓪᓗᑎᒃ (ᓲᕐᓗ, ᖃᔅᓯᑲᓪᓚᐅᓪᓗᑎᒃ ᑲᑎᙵᔪᑦ ᐊᖏᕐᕋᕆᔭᐅᔪᑦ). ᕼᐋᒻᓚᒃᑯᑦ ᑭᒡᓕᒋᔭᐅᔪᓄᑦ ᒪᓕᒐᕋᓛᖏᑦ ᐱᕙᒌᔭᖅᓯᓂᕐᒧᓪᓗ ᐱᖁᔭᖅ ᐋᖅᑭᒃᓯᒪᓕᖅᑎᑦᑎᓂᐊᖅᐳᑦ ᖃᓄᑦ ᑕᒪᒃᑯᐊ ᓄᓇᒥ ᐃᒡᓗᕐᔪᐊᓄᑦ ᐃᓂᒋᔭᐅᔪᑦ ᕿᙳᒻᒥᒐᖅᑕᐅᓇᔭᕐᒪᖔᑕ.
  31. “ᐊᖏᖅᑐᖃᕐᓗᓂ” ᓂᕈᐊᕐᓂᖅᑕᖃᖅᐸᑦ ᐊᓯᔾᔨᖅᓯᓇᔭᖅᐹ ᖃᓄᖅ ᑕᒪᒃᑯᐊ ᐱᖁᑎᓄᑦ ᑖᒃᓯᒋᔭᐅᔪᑦ ᐊᑭᓕᒐᒃᓴᐅᑎᑕᐅᓕᕋᔭᕐᒪᖔᑖ? ᖃᓄᕐᓕ ᑖᒃᓰᔭᖅᑎᑦᑎᓂᕐᒧᒃ ᖃᔅᓯᐅᓇᔭᕐᓂᖏᑦ ᐋᖅᑭᒃᓯᒪᓕᖅᑎᑕᐅᓇᔭᖅᐸᑦ?
    ᐋᒃᑲ. ᐱᖁᑎᒋᔭᐅᔪᒧᑦ ᓇᖕᒥᓂᖃᖅᑏᑦ ᐊᑐᖅᑐᐊᖅᑏᓪᓗ ᐅᓪᓗᒥ ᑖᒃᓰᔭᖅᑎᑕᐅᕙᒃᐳᑦ ᐊᔾᔨᒌᑦᑎᐊᒃᑯᑦ. ᐊᑐᖅᑐᐊᖅᑎ ᓇᖕᒥᓂᖃᖅᑎᐅᓕᖅᐸᑦ ᓄᓇᒥ ᐃᒡᓗᕐᔪᐊᒧᑦ ᐃᓂᒋᔭᒥᓂᒃ, ᖄᒃᑲᓐᓂᐊᒍᑦ ᑖᒃᓰᔭᕐᓂᕐᒧᑦ ᐊᑭᓕᒐᒃᓴᖅᑕᖃᕋᔭᙱᑦᑐᖅ. ᖃᐅᔨᓴᖅᓯᓂᖅ ᐊᑭᖓᓂᒃ ᓄᓇᒥ ᐃᒡᓗᕐᔪᐊᒧᑦ ᐃᓂᒋᔭᐅᔫᑉ ᐋᖅᑭᒃᓯᒪᓕᖅᑎᑕᐅᕙᒃᐳᖅ ᓈᓴᐅᓯᕆᓂᕆᔭᐅᔪᓄᑦ ᐱᓕᕆᐊᖑᓪᓗᑎᒃ ᐱᓕᕆᔪᓐᓇᓪᓚᕆᒃᑐᒧᑦ ᐱᒋᔭᐅᔪᓄᑦ ᖃᐅᔨᓴᖅᑎᒧᑦ. ᖃᔅᓯᑐᕐᓂᕆᔭᖓ ᐋᖅᑭᒃᓯᒪᓕᖅᑎᑕᐅᕙᒃᐳᖅ ᓄᓇᒥᒃ ᐱᕙᓪᓕᐊᑎᑦᑎᓂᕐᒧᑦ ᐊᑭᒋᔭᖏᓐᓄᑦ, ᖃᓄᖅ ᐊᖏᑎᒋᓂᖓᓄᑦ ᓄᓇᒥ ᐃᒡᓗᕐᔪᐊᓄᑦ ᐃᓂᒋᔭᐅᔫᑉ, ᐱᐅᓯᒋᐊᖅᑎᑕᐅᔪᓄᓪᓗ ᑕᕝᕙᓂ ᓄᓇᒥ ᐃᒡᓗᕐᔪᐊᓄᑦ ᐃᓂᒋᔭᐅᔪᒥ. ᑖᒃᓯᒋᔭᐅᑎᑕᐅᔪᑦ ᑐᙵᕕᖃᖅᑎᑕᐅᕙᒃᐳᑦ ᖃᔅᓯᐅᓂᕋᖅᑕᐅᓪᓗᓂ ᐊᑐᖅᑕᐅᕙᒃᑐᒧᑦ ᐅᓄᖅᓯᒋᐊᖅᑕᐅᓪᓗᓂ ᑖᓐᓇ ᖃᐅᔨᓴᖅᑕᐅᓯᒪᓂᖓᑕ ᖃᔅᓯᑐᕐᓂᖓᑕ ᐊᑭᐊᓄᑦ.
  32. ᑖᓐᓇ ᓂᐅᕕᖅᑕᐅᑐᐊᖅᐸᑦ, ᓄᓇᒥᒃ ᐃᒡᓗᕐᔪᐊᒧᑦ ᐃᓂᒋᔭᐅᔪᒥᒃ ᐱᐅᓯᒋᐊᖅᑎᑦᑎᓂᐅᓇᔭᖅᑐᑦ ᓄᓇᖃᖅᑎᐅᔪᒧᑦ ᐊᔪᖅᑎᑕᐅᓇᔭᙱᓛᑦ? ᓲᕐᓗ ᐃᒪᓐᓇ, ᐊᕙᓗᓕᖅᓂᖅ.
    ᖃᓄᕆᑦᑑᓂᖏᑦ ᐱᕙᓪᓕᐊᑎᑕᐅᔪᑦ ᓄᓇᒥ ᐃᒡᓗᕐᔪᐊᕐᒧᑦ ᐃᓂᒋᔭᐅᔪᒥ, ᓲᕐᓗ ᐊᕙᓗᒋᓇᔭᖅᑕᖓᓂᒃ, ᐋᖅᑭᒃᓯᒪᓕᖅᑎᑕᐅᕙᒃᐳᑦ ᑭᒡᓕᒋᔭᐅᔪᓄᑦ ᕿᙳᒻᒥᒐᖅᑕᐅᓯᒪᓪᓗᑎᒃ ᒪᓕᒐᕋᓛᓄᑦ. ᑭᒡᓕᒋᔭᐅᔪᓄᑦ ᕿᙳᒻᒥᒐᖅᑕᐅᓯᒪᓪᓗᑎᒃ ᒪᓕᒐᕋᓛᖅ ᐋᖅᑭᒃᓯᒪᓕᖅᑎᑦᑎᕙᒃᐳᖅ ᖃᓄᕆᑦᑐᒥᒃ ᐱᕙᓪᓕᐊᓂᕆᔭᐅᔪᖅᑕᖃᕈᓐᓇᕐᒪᖓᑦ ᑕᕝᕙᓂ ᓄᓇᒥ ᐃᒡᓗᒃᔪᐊᒧᑦ ᐃᓂᒋᔭᐅᔪᒥ.
  33. “ᐊᖏᖅᑐᖃᕐᓗᓂ” ᓂᕈᐊᕐᓂᖅᑕᖃᖅᐸᑦ, ᑕᐃᒃᑯᐊ ᐃᓕᓯᓯᒪᓪᓗᑎᒃ ᐊᑐᖅᑐᐊᖅᓯᒪᔪᑦ ᓂᐅᕕᕈᓐᓇᕋᔭᖅᐹᑦ ᓄᓇᖁᑎᖏᔭᒥᓃᒃ?
    ᐄ. ᑖᓐᓇ ᐊᑐᖅᑐᐊᖅᑎ ᐊᑭᓖᓯᒪᒃᐸᑦ ᐊᑕᖏᑦᑎᐊᕐᓗᓂᐅᒃ ᐃᓕᓯᓯᒪᓂᕐᒧᑦ ᐊᑐᖅᑐᐊᕐᓂᕐᒥᓂᒃ ᐊᓯᖏᓐᓂᒡᓗ ᐊᑭᓕᖅᓱᒐᒃᓴᓂᒃ, ᐊᑭᓕᐅᑎᓯᒪᔭᖓ ᓇᖕᒥᓂᖃᓕᕐᓂᕐᒧᑦ ᓅᑎᑕᐅᓇᔭᖅᐳᖅ ᐊᑐᖅᑐᐊᖅᑎᒧᑦ ᐊᔪᕐᓇᕈᓐᓃᑐᐊᖅᐸᑦ ᑖᓐᓇ ᐊᑐᖅᑐᐊᖅᑎ ᐊᑭᓖᒃᑲᓐᓂᕆᐊᖃᖅᑎᑕᐅᙱᓪᓗᓂ ᑭᓯᐊᓂ ᐊᑭᓄᑦ ᓴᖅᑭᓕᖅᑐᕕᓂᕐᓄᑦ ᐱᔭᕇᖅᓯᓂᐊᕐᓗᓂ ᑕᒪᑐᒥᖓ ᓅᑎᑦᑎᓂᕆᔭᐅᔪᒥᒃ. ᑭᓯᐊᓂᑦᑕᐅᖅ, ᐊᑐᖅᑐᐊᕐᓂᕆᔭᐅᔪᖅ ᐅᓪᓗᒥᒧᓪᓘᓐᓃᑦ ᐊᖑᒻᒪᑎᔪᖅ ᓄᓇᒥᒃ ᐊᐅᓚᑦᑎᕝᕕᖃᖅᐸᖕᓂᕐᒧᑦ ᒪᓕᒐᕋᓛᖅ ᐱᑎᑦᑎᔭᕆᐊᖃᖅᐳᖅ ᐊᓯᔾᔨᖅᑎᕆᓂᕐᒧᑦ ᐱᔪᓐᓇᐅᑎᒋᔭᐅᔪᒥᒃ. ᑭᑭᑕᐅᓇᔭᖅᑐᖅ ᑕᒪᑐᒧᖓ ᐱᑖᖅᐸᓪᓕᐊᓂᕐᒧᑦ ᐊᑭᓕᖅᓯᓯᒪᓂᕐᒧᑦ ᐊᑐᖅᑐᐊᖅᑕᐅᔪᑦ ᐃᓗᐊᓃᑦᑐᑦ 100 ᐃᓯᒐᐃᑦ ᐃᓗᐊᓂ (100−ᓂᒃ ᐃᓯᒃᑲᓂᒃ ᐅᓕᙶᓕᕌᖓᑦ ᑭᒡᓕᕆᔭᖓᓂᑦ).
  34. “ᐊᖏᖅᑐᖃᕐᓗᓂ” ᓂᕈᐊᖅᑐᖃᖅᐸᑦ, ᒫᓐᓇ ᐱᓕᕆᕝᕕᐅᓯᒪᙱᑦᑐᑦ ᓄᓇᒥ ᐃᒡᓗᕐᔪᐊᒧᑦ ᐃᓂᓴᐃᑦ ᒪᓂᒪᑎᑕᐅᓕᕋᔭᖅᐹᑦ ᓂᐅᕕᖅᑕᐅᔪᓐᓇᕐᓗᑏᒃ?
    ᕼᐋᒻᓚᒋᔭᐅᔪᑦ ᐋᖅᑭᒃᓯᒪᓕᖅᑎᑦᑎᓂᐊᖅᑐᑦ ᓇᓕᐊᒃ ᓄᓇᒥ ᐃᒡᓗᕐᔪᐊᓄᑦ ᐃᓂᒃᓴᐃᑦ ᒪᓂᒪᑎᑕᐅᓇᔭᕐᒪᖓᑕ ᓂᐅᕐᕈᑕᐅᔪᓐᓇᕐᓗᑎᒃ. ᑭᓯᐊᓂᑦᑕᐅᖅ, ᐱᓕᕆᕝᕕᐅᓯᒪᙱᑦᑐᑦ ᓄᓇᒥ ᐃᒡᓗᕐᔪᐊᓄᑦ ᐃᓂᒃᓴᐃᑦ ᑭᙳᒻᒥᒐᖅᑕᐅᓯᒪᔪᑦ ᐱᖃᓕᕐᓂᕐᒧᓪᓗ ᑖᔅᓱᒥᖓ ᓇᓗᓇᐃᖅᑕᐅᓯᒪᓂᖓ ᓅᑎᑕᐅᓯᒪᓕᕐᓗᓂ ᕼᐋᒻᓚᒋᔭᐅᔪᓄᑦ ᒪᓂᒪᑎᑕᐅᓕᕈᓐᓇᖅᐳᑦ ᓂᐅᕕᖅᑕᐅᔪᓐᓇᕐᓗᑎᒃ.
  35. “ᐊᖏᖅᑐᖃᕐᓗᓂ” ᓂᕈᐊᖅᑐᖃᖅᐸᑦ, ᑭᒃᑯᑦ ᐋᖅᑭᒃᓱᐃᕙᓪᓕᐊᓇᔭᖅᐸᑦ ᓄᑖᓂ ᓄᓇᒥ ᐃᒡᓗᕐᔪᐊᓄᑦ ᐃᓂᒃᓴᓂᒃ ᓄᓇᓕᖕᓂ?
    ᕼᐋᒻᓚᒋᔭᐅᔪᑦ ᑲᒪᒋᔭᒃᓴᖃᖃᑦᑕᖅᓯᒪᕗᑦ ᓄᓇᒥᒃ ᐱᕙᓪᓕᐊᑎᑦᑎᓂᕐᒥᒃ 1996−ᖑᓚᐅᕐᓂᖓᓂᑦ. ᓄᓇᕗᑦ ᒐᕙᒪᖓᑕ ᓄᓇᒧᑦ ᐊᑐᐊᒐᖏᑦ ᐃᓚᖏᓪᓗ ᓄᓇᓕᖕᓂ ᓄᓇᒥᒃ ᐊᐅᓚᑦᑎᕝᕕᖃᖅᐸᖕᓂᕐᒧᑦ ᒪᓕᒐᕋᓛᑦ ᒫᓐᓇᒃᑯᑦ ᐱᔪᓐᓇᖅᑎᑦᑎᕗᑦ ᐃᓛᒃᑰᖅᑐᓄᑦ ᓄᓇᓄᑦ ᐱᕙᓪᓕᐊᑎᑦᑎᓂᕐᒥᒃ ᐊᑐᖅᑐᐊᖅᑕᐅᔪᒥ ᓄᓇᒥ, ᑭᓯᐊᓂᑦᑕᐅᖅ, ᐃᓛᒃᑰᖅᑐᓄᑦ ᓄᓇᓄᑦ ᐱᕙᓪᓕᐊᑎᑦᑎᓇᔭᕐᓂᖅ ᓱᓕ ᒫᓐᓇᒧᑦ ᐱᓕᕆᐊᖑᓚᐅᙱᓚᖅ. “ᐊᖏᖅᑐᖃᕐᓗᓂ” ᓂᕈᐊᕐᓂᖅᑕᖃᖅᐸᑦ, ᐃᓛᒃᑰᖅᑐᓄᑦ ᓄᓇᒥ ᐱᕙᓪᓕᐊᑎᑦᑎᓇᔭᕐᓂᖅ ᐱᔪᒥᒋᔭᐅᓂᖅᓴᐅᑐᐃᓐᓇᕆᐊᓕᒃ,(ᑮᓇᐅᔭᒃᑯᕕᓕᕆᔩᑦ ᐱᓯᒪᕝᕕᖃᓕᕋᔭᕐᓂᖏᒻᓄᑦ ᑕᒪᑐᒪᓂ ᓄᓇᒥ) ᐃᒪᐃᓐᓂᖓᓄᑦ, ᑲᒻᐸᓂᒋᔭᐅᔪᑦ ᓂᐅᕕᕈᓐᓇᕋᔭᒃᒪᑕ ᓄᓇᒥᒃ ᑕᒪᓐᓇᓗ ᐋᖅᑭᑦᑎᐊᖅᓯᒪᓂᖅᓴᐅᓕᖅᑎᑦᑎᓇᔭᖅᖢᓂ ᑲᔪᓯᓂᕆᔭᐅᔪᒥᒃ ᑮᓇᐅᔭᖃᖅᑎᑦᑎᓂᐊᕐᓗᓂ ᓴᓇᕝᕕᒋᓂᐊᕐᓗᒍᓗ ᓄᑖᖅ ᐃᒡᓗᓕᐅᕐᕕᐅᒃᑲᓐᓂᕋᔭᖅᑐᖅ. ᕼᐋᒻᓚᒃᑯᑦ ᑲᑎᒪᔨᖏᑦ ᐋᖅᑭᒃᓯᒪᓕᖅᑎᑦᑎᔪᓐᓇᕋᔭᖅᐳᑦ ᓂᐅᕐᕈᑎᖃᕈᒪᓇᔭᕐᒪᖔᕐᒥᓂᒃ ᓄᓇᓂᒃ ᐃᓛᒃᑰᖅᑐᓄᑦ ᐃᓛᒃᑰᕐᓗᑎᒃ ᓄᓇᒥᒃ ᐱᕙᓪᓕᐊᑎᑦᑎᓇᔭᕐᓂᖏᓐᓄᑦ.
  36. ᓇᑭᓪᓕ ᕼᐋᒻᓚᒋᔭᐅᔪᑦ ᑮᓇᐅᔭᖅᑖᕋᔭᕐᒪᑕ ᐋᖅᑭᒃᓱᐃᕙᓪᓕᐊᔪᒪᓗᑎᒃ ᓄᓇᓂᒃ ᐃᒡᓗᕐᔪᐊᓄᑦ ᐃᓂᒃᓴᓂᒃ?
    ᕼᐋᒻᓚᒋᔭᐅᔪᑦ ᐊᑭᓖᖃᑦᑕᐃᓐᓇᕐᓂᐊᖅᐳᑦ ᐱᕙᓪᓕᐊᑎᑦᑎᔪᒪᓂᕐᒧᑦ ᓄᑖᓂᒃ ᓄᓇᒥ ᐃᒡᓗᕐᔪᐊᓄᑦ ᐃᓂᒋᔭᐅᓇᔭᖅᑐᓂᒃ ᓄᓇᒥᒃ ᐱᕙᓪᓕᐊᑎᑦᑎᓂᕐᒧᑦ ᓴᓂᕐᕙᒃᑕᐅᓯᒪᔪᓂᑦ ᑮᓇᐅᔭᖁᑎᒋᔭᐅᔪᓂᑦ ᑖᓐᓇᓗ ᐱᑕᖃᖅᖢᓂ ᑮᓇᐅᔭᓂᒃ ᐱᔭᐅᓂᑯᓂᒃ ᓴᒃᑯᑦᑎᓂᕆᔭᐅᔪᓂᑦ (ᓂᐅᕐᕈᑎᖃᕐᓂᕐᒧᑦ ᐊᑐᖅᑐᐊᖅᑎᑦᑎᓂᕐᒧᓪᓗ) ᓄᓇᒥ ᐃᒡᓗᕐᔪᐊᓄᑦ ᐃᓂᒋᔭᐅᔪᓂᒃ. ᑮᓇᐅᔭᐃᑦ ᐊᒥᒐᓗᐊᖅᐸᑕ ᓴᓂᕐᕙᒃᑕᐅᓯᒪᔪᓂᑦ ᑮᓇᐅᔭᖁᑎᒋᔭᐅᔪᓂᑦ, ᑖᒃᑯᐊ ᕼᐋᒻᓚᒋᔭᐅᔪᑦ ᐊᑐᖅᑐᐊᑐᐃᓐᓇᕆᐊᖃᖅᐳᑦ ᑮᓇᐅᔭᓂᒃ ᓄᓇᒥ ᐱᕙᓪᓕᐊᑎᑦᑎᔪᒪᓂᕐᒥᓄᑦ. ᐊᓯᐊᑦᑕᐅᖅ ᐊᑐᖅᑕᐅᖔᓕᕈᓐᓇᕐᒥᔪᖅ ᐱᕕᒃᓴᖃᖅᑎᑦᑎᓇᔭᕐᓂᖅ ᐃᓛᒃᑰᖅᑐᓂᒃ ᑮᓇᐅᔭᖃᑎᑦᑎᔪᓐᓇᖅᑎᓪᓗᒋᑦ ᓴᓇᔪᓐᓇᖅᑎᓪᓗᒋᓪᓗ ᓄᑖᓂ ᓄᓇᓕᖕᓂ ᐃᓂᒋᔭᐅᒃᑲᓐᓂᕐᕕᐅᓇᔭᖅᑐᓂ.
  37. ᓄᓇᕗᑦ ᒐᕙᒪᖓ ᓇᖕᒥᓂᖃᖅᐸᑦ ᓄᓇᒥᒃ, ᑖᒃᑯᐊ ᓄᓇᕗᑦ ᒐᕙᒪᒃᑯᖏᑦ ᑮᓇᐅᔭᓕᐅᕐᓂᖃᕋᔭᖅᐹᑦ “ᐊᖏᖅᑐᖃᕐᓗᓂ” ᓂᕈᐊᕐᓂᖅᑕᖃᖅᐹᑦ?
    ᐋᒃᑲ. ᓄᓇᕗᖅ ᒐᕙᒪᖓ ᑮᓇᐅᔭᓕᐅᕈᓐᓇᙱᑦᑐᖅ ᓂᐅᕐᕈᑕᐅᔪᓄᑦ ᕼᐋᒻᓚᒃᑯᑦ ᓄᓇᖁᑎᖏᓐᓄᑦ. ᑎᑎᕋᖅᓯᒪᓂᖓ 7 ᑎᑎᕋᖅᓯᒪᔪᓂ 14−ᒥ ᓄᓇᕘᒥᒃ ᓄᓇᑖᕐᓂᕐᒧᑦ ᐊᖏᖃᑎᒌᒍᑕᐅᓯᒪᔪᒥ ᐃᒪᓐᓇ ᐅᖃᖅᓯᒪᕗᖅ, ᓄᓇᕗᑦ ᒐᕙᒪᖓ ᐋᖅᑭᒃᓯᒪᓕᖅᑎᑦᑎᑉᐸᑕ ᓄᓇᒥᒃ ᕼᐋᒻᓚᒃᑯᑦ ᑭᒡᓕᒋᔭᖓᑕ ᐃᓗᐊᓃᑦᑐᒥᒃ ᐱᔭᐅᓯᒪᔭᕆᐊᖃᕈᓐᓃᕐᓂᕋᐃᓗᑎᒃ, ᑖᓐᓇ ᐅᖃᐅᓯᕆᔭᕆᐊᖃᖅᐸᖓᑦ ᐱᒋᔭᐅᒃᑲᓐᓂᑐᐃᓐᓇᓕᕐᓂᖓᓂᒃ ᓂᐅᕐᕈᑎᒋᓗᒍᓗ ᕼᐋᒻᓚᒃᑯᑦ ᑯᐊᐳᕇᓴᕆᔭᖓᓄᑦ ᐱᑎᑕᐅᓗᑎᒃ ᓈᒻᒪᒃᑐᓂᒃ ᑮᓇᐅᔭᓂᒃ. ᑭᖑᓪᓕᖅᐹᖅ ᐃᒪᐃᓕᖓᓂᕆᔭᐅᓕᕋᔭᖅᑐᖅ ᐅᓇᐅᕗᖅ, ᓄᓇᕗᑦ ᒐᕙᒪᒃᑯᖏᑦ ᓂᐅᕐᕈᑎᖃᕈᓐᓇᙱᓚᑦ ᑮᓇᐅᔭᓕᐅᕈᑎᒋᓗᒍ; ᓅᑎᑦᑎᔪᓐᓇᑐᐃᓐᓇᖅᐳᑦ ᐱᒋᔭᐅᓕᕐᓂᖓᓂᒃ ᕼᐋᒻᓚᒋᔭᐅᔪᓄᑦ.



ᖃᕆᓴᐅᔭᒃᑯᑦ ᐊᑐᖅᑕᐅᔪᓐᓇᖅᑐᑦ ᐱᓕᕆᔾᔪᑕᐅᓗᑎᒃ

ᓄᓇᙳᐊᖁᑎᒋᔭᐅᔪᑦ
ᓄᓇᓖᑦ

100-ᓂᒃ ᐃᓯᒐᓪᓗᐊᓂᒃ ᑕᑭᓂᓕᒃ ᓄᓇ

ᐊᐱᖅᑯᑕᐅᒐᔪᒃᐸᒃᑐᑦ ᐊᐱᖅᑯᑎᒃᓴᐃᑦ
ᓄᓇᒥᒃ ᓂᕈᐊᕈᑎᖃᕐᓂᕐᒧᑦ ᐊᐱᖅᑯᑏᑦ ᐊᐱᕆᔭᐅᔾᔪᑕᐅᒐᔪᒃᑐᑦ ᓂᕈᐊᕐᓂᖅ

ᓄᓇᒥᒃ ᐊᑐᖅᑐᐊᕐᓂᕐᒧᑦ ᓄᓇᒥᒡᓗ ᐊᑐᕐᓂᕐᒧᑦ ᐊᐱᖅᑯᑎᒃᓴᕆᔭᐅᕙᒃᑐᑦ

ᑕᑯᔅᓴᕈᕈᓐᓇᖅᑐᑦ ᐊᒃᑐᐃᓂᖃᓐᓃᑦ

ᖃᓄᐃᓕᐅᒐᒃᓴᐃᑦ
ᐃᓄᓕᒫᓄᑦ ᑐᓴᒐᒃᓴᖅ

ᓂᕈᐊᕐᓂᖅ

ᐱᕙᓪᓕᐊᔪᑦ
ᓄᓇᒥᑦ ᓂᕈᐊᖕᓂᖅ

ᐊᑐᐊᒐᐃᑦ ᒪᓕᒋᐊᖃᖅᐸᒃᑐᓪᓗ ᒪᓕᒐᐃᑦ

ᐅᖃᐅᓯᓕᕆᔾᔪᑎ



©2010 Government of Nunavut | Privacy Statement